ବରଗଡ: ଜିଲ୍ଲାର ପଦ୍ମପୁର ଉପଖଣ୍ଡରେ ଅପରାଧ ଦିନକୁ ଦିନ ବଢିଚାଲିଛି । ଏହାସହ ଖଣି ମାଫିଆଙ୍କ ଗୁଣ୍ଡାରାଜ ମଧ୍ୟ ବୃଦ୍ଧି ପାଉଛି । ହେଲେ ଏହି ଅଞ୍ଚଳରେ ପୋଲିସର ନିଷ୍କ୍ରିୟତା ଅଞ୍ଚଳବାସୀଙ୍କୁ ନାରାଜ କରିଛି । ନିକଟରେ ଘଟିଥିବା ନାବାଳିକା ହତ୍ୟାକାଣ୍ଡ ମାମଲାରେ ପୋଲିସର ଶିଥିଳତା ଲୋକଙ୍କ ଭିତରେ ଅସନ୍ତୋଷ ସୃଷ୍ଟି କରିଛି ।
ଗତ ଜୁନ ୧୨ ତାରିଖ ରାତିରେ ଜଗଦଲପୁର ଥାନା ଅନ୍ତର୍ଗତ ଲଉଡି ଦର୍ହା ଗ୍ରାମରେ ଘଟିଥିଲା ଏହି ଅଘଟଣ । ଏଠାରେ ବିରଞ୍ଚି ସାମଲଙ୍କ ୧୪ ବର୍ଷିୟା ନାବାଳିକା ଘରୁ ନିଖୋଜ ହୋଇଯାଇଥିଲା । ଘର ଲୋକେ ବହୁ ଖୋଜାଖୋଜି କଲା ପରେ ରାତିରେ ନାବାଳିକାଙ୍କ ମୃତଦେହ ପାଇଥିଲେ । ସେହି ଗ୍ରାମର ଭୁବନେଶ୍ବର ପ୍ରଧାନଙ୍କ କ୍ଷେତ ନିକଟରେ ଏକ କୂଅ ପରିସରରୁ ଏହା ମିଳିଥିଲା ।
ପରିବାର ଲୋକେ ଜଗଦଳପୁର ପୋଲିସକୁ ଜଣାଇ ହତ୍ୟାର କାରଣ ପ୍ରେମ ଜନିତ ହୋଇଥିବାର କହିଥିଲେ । ନାବାଳିକାଙ୍କର ସେହି ଗ୍ରାମର ଭୁବନେଶ୍ବର ପ୍ରଧାନଙ୍କ ପୁଅ ସନ୍ଦେଶ ପ୍ରଧାନ ସହିତ ପ୍ରେମ ସମ୍ପର୍କ ରହିଥିଲା । ତେବେ ହଠାତ ରାତିରେ ନାବାଳିକା ନିଖୋଜ ହେବା ଓ ତାର ମୃତଦେହ ପ୍ରେମିକଙ୍କ ବିଲ ନିକଟରେ ପଡିଥିବା ଘଟଣାରେ ଘର ଲୋକେ ସନ୍ଦେଶ ପ୍ରଧାନକୁ ହତ୍ୟାକାରୀ ବୋଲି ସନ୍ଦେହ କରିଥିଲେ ।