ଟୋକିଓ:ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଦେଇଛନ୍ତି ଭାରତୀୟ ମହିଳା ହକି ଦଳର ଅଧିନାୟକ ରାନୀ ରାମପାଲ । ସୋସିଆଲ ମିଡିଆରେ ଏକ ଭିଡିଓ ସେୟାର କରି ସେ ମୁଖ୍ୟମନ୍ତ୍ରୀଙ୍କୁ ସମସ୍ତ ସହଯୋଗ ପାଇଁ ଧନ୍ୟବାଦ ଜଣାଇଛନ୍ତି । ଜାତୀୟ ମହିଳା ଟିମର ଏହି ଯାତ୍ରାର ସମସ୍ତ ଶ୍ରେୟ ନବୀନଙ୍କୁ ଦେଇଛନ୍ତି ରାନୀ ରାମପାଲ ।
ସୋସିଆଲ ମିଡିଆ ଭିଡିଓ ସେୟାର କରି ରାନୀ ରାମପାଲ କହିଛନ୍ତି ଯେ, "ଆଜି ସାରା ବିଶ୍ବରେ ଭରତୀୟ ମହିଳା ହକି ଦଳକୁ ଏକ ଶକ୍ତିଶାଳୀ ଦଳ ଭାବରେ ବିବେଚନା କରାଯାଉଛି । ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଯୋଗୁଁ ଏସବୁ ସମ୍ଭବ ହୋଇ ପାରିଛି । ଓଡ଼ିଶା ମୁଖ୍ୟମନ୍ତ୍ରୀ ଆମକୁ ଏକ ପ୍ଲାଟଫର୍ମ ଯୋଗାଇ ଦେଲେ ଯାହା ଦ୍ବାରା ଆମେ ନିଜକୁ ପ୍ରମାଣିତ ସୁଯୋଗ ପାଇଲୁ । ଆଜି ଜାତୀୟ ମହିଳା ହକି ଦଳ ପୁରୁଷ ହକି ଦଳ ସହ ଏକ ବିଶ୍ବସ୍ତର ପ୍ରତିଯୋଗିତାରେ ନେଇ ଦେଶ ପାଇଁ ଗର୍ବ ଗୌରବ ଆଣିବାକୁ ଚେଷ୍ଟା କରିଥିଲା । ବର୍ତ୍ତମାନ ଆମ ପାଖରେ ସଫଳତା ହାସଲ କରିବା ପାଇଁ ସମସ୍ତ ପ୍ରକାର ସାଧନ ଅଛି । ଏଥିପାଇଁ ମୁଁ ଜାତୀୟ ମହିଳା ହକି ଦଳ ତରଫରୁ ନବୀନ ସାରଙ୍କୁ ଧନ୍ୟବାଦ ଦେଉଛି । ଏହା ଆରମ୍ଭ ମାତ୍ର, ଆଶା କରୁଛୁ ଆଗକୁ ଆମେ ଏଭଳି ଭାବରେ ଗୌରବାନ୍ବିତ କରି ପାରିବୁ ।"