ଭୁବନେଶ୍ବର: ରାଉରକେଲାର ବିର୍ସାମୁଣ୍ଡା ହକି ଷ୍ଟାଡିୟମରେ ଆସନ୍ତା ମାସରୁ ହକି ପ୍ରୋ ଲିଗ ମ୍ୟାଚ ଅନୁଷ୍ଠିତ ହେବ । ଏନେଇ ହକି ଇଣ୍ଡିଆ 20 ଜଣିଆ ଭାରତୀୟ ଦଳ ଘୋଷଣା କରିଛି । ହର୍ମପ୍ରୀତ ସିଂଙ୍କୁ ଦଳ ନେତୃତ୍ବ ମିଳିଥିବା ବେଳେ ନୀଲମ ସଞ୍ଜୀପ ଖେସ ଏକମାତ୍ର ଓଡିଆ ଖେଳାଳି ଭାବେ ଦଳରେ ସ୍ଥାନ ପାଇଛନ୍ତି । ମିଡ ଫିଲ୍ଡର ହାର୍ଦ୍ଦିକ ସିଂହଙ୍କୁ ଉପ ଅଧିନାୟକ ନିଯୁକ୍ତ କରାଯାଇଛି । ଏହାସହ ଦଳରେ କିଛି ନୂଆ ଚେହେରା ସାମିଲ ହୋଇଛନ୍ତି ।
ଅଷ୍ଟ୍ରେଲିଆ ଓ ଜର୍ମାନୀ ବିପକ୍ଷରେ ହକି ପ୍ରୋ ଲିଗ ମ୍ୟାଚ ଖେଳିବ ଭାରତ । ଆସନ୍ତା ମାର୍ଚ୍ଚ 10 ତାରିଖରେ ଦଳ ପ୍ରଥମ ମ୍ୟାଚରେ ଜର୍ମାନୀକୁ ଭେଟିବ । 12 ତାରିଖରେ ଅଷ୍ଟ୍ରେଲିଆ, 13 ତାରିଖରେ ଜର୍ମାନୀ ଏବଂ 15 ତାରିଖରେ ପୁଣି ଅଷ୍ଟ୍ରେଲିଆ ବିପକ୍ଷରେ ମ୍ୟାଚ ଖେଳିବ ଭାରତ । ପୁରୁଷ ହକି ବିଶ୍ବକପରେ ଭାରତର ନୈରଶ୍ୟଜନକ ପ୍ରଦର୍ଶନ ଦେଖିବାକୁ ମିଳିଥିଲା । ବିଶ୍ବକପରେ କରିଥିବା ତ୍ରୁଟିକୁ ସୁଧାରି ପ୍ରୋ ଲିଗରେ ଦମଦାର ପ୍ରଦର୍ଶନ କରିବାକୁ ହେବ । ଦଳ ଏନେଇ ଏକ ସନ୍ତୁଳିତ ଦଳ ପ୍ରସ୍ତୁତ କରିଛି । ଜାତୀୟ ଚୟନକର୍ତ୍ତା ଏହି ମୁକାବିଲା ପାଇଁ ଅଭିଜ୍ଞ ଓ ଯୁବ ଖେଳାଳଙ୍କୁ ନେଇ ଏକ ମିଶ୍ର ଦଳ ଗଠନ କରିଛନ୍ତି । ଓଡିଆ ଖେଳାଳି ଅମିତ ରୋହିତଦାସ ଦଳରୁ ବାଦ ପଡିଛନ୍ତି । ଘୋଷିତ ଭାରତୀୟ ଦଳ ମାର୍ଚ୍ଚ 6 ତାରିଖରୁ ବେଙ୍ଗାଲୁରୁରେ ରହି ଅଭ୍ୟାସ କରିବ । ଏହାପରେ ଦଳ ରାଉରକେଲା ଆସିବ ।