ନୂଆଦିଲ୍ଲୀ:ନେଦରଲାଣ୍ଡସ ଗସ୍ତରେ ଥିବା ଭାରତୀୟ ପୁରୁଷ ହକି ଦଳ ଘରୋଇ ନେଦରଲାଣ୍ଡସଠୁ ପରାସ୍ତ ହୋଇଛି । 3-2 ଗୋଲରେ ପରାସ୍ତ ହୋଇଛି ଭାରତ । ଆଜି ଆର୍ଜେଣ୍ଟିନା ବିପକ୍ଷରେ ଖେଳିବ ଭାରତ । ଏଫଆଇଏଚ ପ୍ରୋ ଲିଗ ମ୍ୟାଚରେ ଘରୋଇ ନେଦରଲାଣ୍ଡସକୁ ଭେଟିଥିଲା ଭାରତ । ଏହି ମ୍ୟାଚର 59 ମିନିଟରେ ପେନାଲ୍ଟି ସୁଯୋଗ ହାତଛଡା କରି ଦଳ ପରାସ୍ତ ହୋଇଛି । ପ୍ରଥମ କ୍ବାର୍ଟରର ପ୍ରଥମ ମିନିଟରେ ଭାରତକୁ 2ଟି ପେନାଲ୍ଟି କର୍ଣ୍ଣର ମିଳିଥିଲେ ବି ଭାରତ ଗୋଲ କରିବାରେ ବିଫଳ ହୋଇଥିଲା । ଏହାପରେ ନେଦରଲାଣ୍ଡସ ଘନ ଘନ ଆକ୍ରମଣ କରିଥିଲା । ସପ୍ତମ ମିନିଟରେ ଘରୋଇ ଦଳର ଡୁକୋ ଟେଲେଜେନକ୍ୟାମ୍ପ ଗୋଲ କରି ଦଳ ପାଇଁ ଖାତା ଖୋଲିଥିଲେ । ଏହି ଭାଗରେ ଭାରତ ଗୋଲ ପରିଶୋଧ କରିପାରିନଥିଲା ।
ଦ୍ବିତୀୟ କ୍ବାର୍ଟରର ଭାରତର ସଞ୍ଜୟ ଏକ ଗୋଲ କରି ସ୍ଥିତି ବରାବର କରିଥିଲେ । ତୃତୀୟ କ୍ବାର୍ଟରରେ ନେଦରଲାଣ୍ଡସ ଆଉ ଦୁଇଟି ଗୋଲ କରି ମ୍ୟାଚ ନିୟନ୍ତ୍ରଣକୁ ଆଣିଥିଲା । 43ମିନିଟରେ ଟଜେପ ହୋଇଡେମାର୍କରସ ଓ 47 ମିନିଟରେ ବୋରିସ ଦୁଇଟି ଗୋଲ କରିଥିଲେ । ଚତୁର୍ଥ କ୍ବାର୍ଟରର 46 ମିନିଟରେ ଗୁରଜନ୍ତ ସିଂହ ଭାରତ ପାଇଁ ଦ୍ବିତୀୟ ଗୋଲ କରିଥିଲେ । ଭାରତ ପାଇଁ ଆଶା ସଞ୍ଚାର ହୋଇଥିଲା । ମ୍ୟାଚର 59 ମିନିଟରେ ପେନାଲ୍ଚି ସୁଟଆଉଟର ହାତଛଡା କରି ନେଦରଲାଣ୍ଡସଠୁ ପରାସ୍ତ ହୋଇଥିଲା ଭାରତ । ଏହି ପରାଜୟ ସତ୍ତ୍ବେ ଭାରତ ପଏଣ୍ଟ ତାଲିକାରେ ଶୀର୍ଷ ସ୍ଥାନ ବଜାୟ ରଖିଛି । ଆଜି ଆର୍ଜେଣ୍ଟିନା ବିପକ୍ଷରେ ଏକ ମ୍ୟାଚ ଖେଳିବ ପୁରୁଷ ଭାରତୀୟ ହକି ଦଳ ।