ନୂଆଦିଲ୍ଲୀ:ଭାରତୀୟ ଟେଷ୍ଟ ଭାଇସ-କ୍ୟାପଟେନ ଅଜିଙ୍କ୍ୟ ରାହାଣେ ରବିବାର 33ବର୍ଷରେ ପାଦ ଥାପିଛନ୍ତି । ଫଳରେ ରାହାଣେଙ୍କୁ ସାଥୀ ଖେଳାଳି ଓ ଫ୍ୟାନ୍ସଙ୍କ ଶୁଭେଚ୍ଛାର ସୁଅ ଛୁଟିଛି । କ୍ୟାପଟେନ ବିରାଟ କୋହଲି ଓ ପୂର୍ବତନ କ୍ରିକେଟର ୱାସିମ ଜାଫର ରାହାଣେଙ୍କୁ ଜନ୍ମଦିନରେ ଖାସ୍ ଶୁଭେଚ୍ଛାବାର୍ତ୍ତା ପଠାଇଛନ୍ତି ।
ଅନ୍ତର୍ଜାତୀୟ କ୍ରିକେଟ ପରିଷଦ ଓ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ ମଧ୍ୟ ରାହାଣେଙ୍କୁ ଜନ୍ମଦିନର ଶୁଭେଚ୍ଛା ଜଣାଇଛନ୍ତି । 2019ରେ ଦକ୍ଷିଣ ଆଫ୍ରିକା ବିପକ୍ଷରେ ରାହାଣେଙ୍କ 115 ରନର ଇଂନିସର ଭିଡିଓ ମଧ୍ୟ ସେୟାର କରିଛି ବିସିସିଆଇ । 183 ଅନ୍ତର୍ଜାତୀୟ ମ୍ୟାଚରୁ 7920 ରନ ସଂଗ୍ରହ କରିସାରିଛନ୍ତି ରାହାଣେ ଓ ତାଙ୍କ ନେତୃତ୍ବରେ ଭାରତ ନିକଟରେ ଅଷ୍ଟ୍ରେଲିଆରେ 2020-21ରେ ଚର୍ଚ୍ଚିତ ବର୍ଡର ଗାଭାସ୍କର ଟ୍ରଫି ବିଜୟୀ ହୋଇଥିଲା ବୋଲି ଆଇସିସି ଟ୍ବିଟ କରିଛି ।