ହାଇଦ୍ରାବାଦ: ଉଭୟ ODI ଓ T20 ବିଶ୍ବକପ ବିଜୟୀ ହୋଇ ମହେନ୍ଦ୍ର ସିଂ ଧୋନୀଙ୍କ ସମକକ୍ଷ ହୋଇଛନ୍ତି ଇଂଲଣ୍ଡ ଅଧନାୟକ ଜୋଶ ବଟଲର । ୱିକେଟକିପର ଭାବରେ ଲକି କ୍ରିକେଟର ସାବ୍ୟସ୍ତ ହୋଇଛନ୍ତି ଜୋସ୍ ବଟଲର । ପୂର୍ବରୁ କେବଳ ମହେନ୍ଦ୍ର ସିଂହ ଧୋନୀଙ୍କ ନାମରେ ଦୁଇଟି ଫର୍ମାଟରେ ବିଶ୍ବକପ ବିଜୟୀ ହେବା ରେକର୍ଡ ରହିଥିଲା । ଶେଷ ହୋଇଛି ଫଟାଫଟ୍ କ୍ରିକେଟ ମହାସମର । 2022 ବିଶ୍ବ ଚମ୍ପିଆନ ହୋଇଛି ଇଂଲଣ୍ଡ । ତେବେ ଇଂଲିସ୍ ଟିମ୍ ବିଶ୍ବ ଚମ୍ପିଆନ ହେବାପରେ ଦଳକୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି । ଜୋସ୍ ବଟଲରଙ୍କ ନେତୃତ୍ବରେ ଇଂଲଣ୍ଡ ପୁଣି ଥରେ ୧୨ ବର୍ଷ ପରେ ଟି୨୦ ବିଶ୍ବକପ ହାତେବାରେ ସଫଳ ହୋଇଛି ।
ବର୍ଷ ୨୦୧୯ରେ ଖେଳାଯାଇଥିବା ଦିନିକିଆ ବିଶ୍ବକପରେ ଇଂଲଣ୍ଡ ଇଅନ ମୋର୍ଗାନଙ୍କ ନେତୃତ୍ବରେ ବିଶ୍ବ ବିଜେତା ହୋଇଥିଲା । ଏହି ଟୁର୍ଣ୍ଣାମେଣ୍ଟରେ ୱିକେଟକିପର ଭାବେ ଜୋସ୍ ବଟଲରଙ୍କ ଭୂମିକା ଗୁରୁତ୍ବପୂର୍ଣ୍ଣ ରହିଥିଲା । ୨୦୨୨ ଟି୨୦ ବିଶ୍ବକପ ଇଂଲଣ୍ଡ ଟିମ୍ର କମାନ୍ ଏଥର ଜୋସ୍ ବଟଲରଙ୍କ ହାତରେ ରହିଥିଲା । ସେ ଦଳର ଅଧିନାୟକ ସହିତ ୱିକେଟକିପର ଭାବରେ ଦଳରେ ନିଜର ଦାୟିତ୍ବ ତୁଲାଇଥିଲେ । ବଟଲରଙ୍କ ନେତୃତ୍ବରେ ଇଂଲିସ୍ ଟିମ୍ ମିଶନ ମେଲ୍ବର୍ଣ୍ଣ ପାଇଁ ରଣନୀତି ପ୍ରସ୍ତୁତ କରିଥିଲା । ବଟଲର ୱିକେଟ ପଛରେ ରହି ବିପକ୍ଷ ଦଳକୁ ମାତ୍ ଦେବା ପାଇଁ ପ୍ରସ୍ତୁତ କରୁଥିଲେ ବ୍ଲୁ ପ୍ରିଣ୍ଟ୍ । ଶେଷରେ ବିଶ୍ବକପ ଦୌଡରେ ୧୧ଟି ଦଳକୁ ପଛରେ ପକାଇ ଟି୨୦ ବିଶ୍ବକପ ଟ୍ରଫି ଉଠାଇଛି ଇଂଲଣ୍ଡ ।
ସେହିପରି ଏହି ତାଲିକାରେ ପୂର୍ବରୁ ଯୋଡି ହୋଇଥିଲେ କ୍ୟାପଟେନ କୁଲ ତଥା ମହେନ୍ଦ୍ର ସିଂ ଧୋନୀ । ଭାରତର ଏହି ସଫଳ ଅଧିନାୟକ ତଥା କ୍ୟାପଟେନ କୁଲ ୱିକେଟକିପର ଭାବେ ଭାରତକୁ ଉଭୟ ଟି୨୦ ଓ ଦିନିକିଆ ବିଶ୍ବକପ୍ ଟ୍ରଫି ଭେଟି ଦେଇଛନ୍ତି । ମହେନ୍ଦ୍ର ସିଂହ ଧୋନୀ ଏକା ସାଙ୍ଗରେ ଟିମ୍ ଇଣ୍ଡିଆର ଅଧିନାୟକ ହେବା ସହିତ ୱିକେଟକିପର ଦାୟିତ୍ବ ବହନ କରୁଥିଲେ । କପିଲ ଦେବଙ୍କ ନେତୃତ୍ବରେ ୧୯୮୩ ମସିହାରେ ପ୍ରଥମ ଥର ପାଇଁ ଭାରତ ଦିନିକିଆ ବିଶ୍ବକପ ବିଜୟୀ ହୋଇଥିଲା । ଏହାପରେ ମେନ୍ ଇନ୍ ବ୍ଲୁ ବର୍ଷ ୨୦୧୧ରେ ମହେନ୍ଦ୍ର ସିଂ ଧୋନୀଙ୍କ ନେତୃତ୍ବରେ ଦ୍ବିତୀୟ ଦିନିକିଆ ବିଶ୍ବକପ ହାତେଇବାରେ ସଫଳ ହୋଇଥିଲା । ସେହିପରି ଧୋନୀ ଟି୨୦ ବିଶ୍ବକପର ପ୍ରଥମ ସଂସ୍କରଣ ତଥା ୨୦୦୭ ମସିହାରେ ଭାରତକୁ ବିଶ୍ବ ଚମ୍ପିଆନ୍ କରାଇଥିଲେ । ଏହି ଦୁଇଟି ବିଶ୍ବକପରେ ଧୋନୀ ୱିକେଟ ପଛରେ ରହି ବିଶ୍ବକପ ହାତେଇବାର ରଣନୀତି ପ୍ରସ୍ତୁତ କରୁଥିଲେ । ମହେନ୍ଦ୍ର ସିଂ ଧୋନୀ ଜଣେ ଅଧିନାୟକ ଓ ୱିକେଟକିପର ଭାବେ ଦୁଇଟି ବିଶ୍ବକପ ହାତେବାରେ ରେକର୍ଡ କରିଥିବା ବେଳେ ବର୍ତ୍ତମାନେ ଏହି ରେକର୍ଡର ସମକକ୍ଷ ହୋଇଛନ୍ତି ଜୋଶ ବଟଲର ।