ପୁନେ:ଭାରତ 3 ମ୍ୟାଚ ବିଶିଷ୍ଟ ଦିନିକିଆ ସିରିଜ ବିଜୟ ଲକ୍ଷ୍ୟରେ ରହିବ । ଶୁକ୍ରବାର ମହାରାଷ୍ଟ୍ର କ୍ରିକେଟ ଆସୋସିଏସନ ଷ୍ଟାଡିୟମରେ ଭାରତ ଓ ଇଂଲଣ୍ଡ ମଧ୍ୟରେ ଦ୍ବିତୀୟ ଦିନିକିଆ ମୁକାବିଲା ରହିଛି । ତେବେ ଏହି ମ୍ୟାଚରେ ଇଂଲଣ୍ଡ କ୍ୟାପଟେନ ଇଆନ ମୋର୍ଗାନଙ୍କ ବିନା ଖେଳିବ । ପ୍ରଥମ ଦିନିକିଆରେ ଆହତ ହେବାପରେ ସିରିଜର ଅବଶିଷ୍ଟ ଦୁଇଟି ମ୍ୟାଚରୁ ବାଦ ପଡିଛନ୍ତି ମୋର୍ଗାନ । ଫଳରେ ମୋର୍ଗାନଙ୍କ ଅନୁପସ୍ଥିତିରେ ଜସ ବଟଲର ଦଳର କ୍ୟାପଟେନ ଦାୟିତ୍ବ ସମ୍ଭାଳିବେ ।
ପ୍ରଥମ ଦିନିକିଆକୁ ବିରାଟ ବାହିନୀ 66 ରନରେ ଜିତିନେବା ସହ ସିରିଜର 1-0ରେ ଆଗୁଆ ରହିଛି । ଅଲରାଉଣ୍ଡର କ୍ରୁଣାଳ ପାଣ୍ଡ୍ୟା ଓ ପ୍ରସିଦ୍ଧ କ୍ରୀଷ୍ଣା ଡେବ୍ୟୁ ମ୍ୟାଚରେ ଦମଦାର ପ୍ରଦର୍ଶନ ସହ ବିଜୟରେ ପ୍ରମୁଖ ଭୂମିକା ନିଭାଇଥିଲେ । ତେବେ ଭାରତକୁ ମଧ୍ୟ ଆହତ ଜନିତ ଝଟକା ଲାଗିଛି । ଷ୍ଟାର ବ୍ୟାଟ୍ସମ୍ୟାନ ଶ୍ରେୟସ ଆୟର ଫିଲ୍ଡିଂରେ କାନ୍ଧରେ ଆଘାତପ୍ରାପ୍ତ ହୋଇଥିଲେ । ପରେ ସିରିଜରୁ ବାଦ ପଡିଛନ୍ତି । ଆୟରଙ୍କ ସ୍ଥାନରେ ଚୁଡାନ୍ତ ଏକାଦଶରେ ସୂର୍ଯ୍ୟକୁମାର ଯାଦବଙ୍କୁ ସୁଯୋଗ ମିଳିବା ସମ୍ଭାବନା ରହିଛି ।
ଭାରତ ପୂର୍ବରୁ ଟେଷ୍ଟ ସିରିଜକୁ 3-1 ଓ 5 ମ୍ୟାଚ ବିଶିଷ୍ଟ ଟି20 ସିରିଜକୁ 3-2ରେ ଜିତିସାରିଛି । ଫଳରେ ଆଜିର ମ୍ୟାଚରେ ଭାରତ ବିଜୟୀ ହେଲେ, ଇଂଲଣ୍ଡ ବିପକ୍ଷରେ ଚଳିତ ଗସ୍ତର ସମସ୍ତ 3ଟି ଫର୍ମାଟରେ ହାଟ୍ରିକ ବିଜୟ ସହ ସିରିଜ କ୍ଲିନ ସୁଇପ କରିବ ।