ମେଲବର୍ଣ୍ଣ : ଇଂଲିସ ଟିମର ବିଜୟ ରାସ୍ତାରେ ଖଳନାୟକ ସାଜିଛି ବର୍ଷା । ବର୍ଷା କାରଣରୁ ଇଂଲଣ୍ଡ ଜିତିବା ମ୍ୟାଚରେ ପରାସ୍ତ ହୋଇଛି । ଏହା ସହିତ ଇଂଲଣ୍ଡର ପଏଣ୍ଟ ସମୀକରଣ ମଧ୍ୟ ଓଲଟ ପାଲଟ ହୋଇଛି । ଏନେଇ ନିରାଶ ହୋଇଛନ୍ତି ଅଧିନାୟକ ଜସ୍ ବଟଲର । ଏହା ସହିତ ସେ ବିଶ୍ବକପକୁ ନେଇ ଚାପରେ ଥିବା ନଜର ଆସିଛନ୍ତି ।
ଶକ୍ତିଶାଳୀ ଇଂଲଣ୍ଡ ବିଜୟରୁ ବିଶ୍ବକପ ଅଭିଯାନ ଆରମ୍ଭ କରିଥିଲା । ହେଲେ ପରବର୍ତ୍ତୀ ମୁହୂର୍ତ୍ତରେ ଦଳ ପାଇଁ ବର୍ଷା କଣ୍ଟା ସାଜିଥିଲା । ବର୍ଷା ପାଇଁ ଆୟରଲାଣ୍ଡ ବିପକ୍ଷରେ DLS ମେଥଡ ପ୍ରୟୋଗ କରାଯାଇଥିଲା । ଏଥିରେ ଇଂଲଣ୍ଡ ୫ ରନରେ ପରାସ୍ତ ହୋଇଥିଲା । ଯାହା ଇଂଲଣ୍ଡକୁ ଶକ୍ତ ଝଟକା ଲାଗିଥିଲା । ସେହିପରି ପରବର୍ତ୍ତୀ ମ୍ୟାଚ ଆୟୋଜକ ତଥା ଡିଫେଣ୍ଡିଂ ଚମ୍ପିଆନ ଅଷ୍ଟ୍ରେଲିଆ ସହିତ ରହିଥିଲା । ବଟଲରଙ୍କ କହିବା ମୁତାବକ ଇଂଲିସ ଟିମ କଙ୍ଗାରୁ ଦଳକୁ ସାମ୍ନା କରିବା ପାଇଁ ରଣନୀତି ପ୍ରସ୍ତୁତ କରିଥିଲା ।
ହେଲେ ଏଥିରେ ମଧ୍ୟ ବର୍ଷା ବଟଲରଙ୍କ ସବୁ ଯୋଜନାରେ ପାଣି ପକାଇଦେଇଥିଲା । ମ୍ୟାଚ ବାତିଲ ପରେ ଅଧିନାୟକ ବଟଲର ନିରାଶ ହୋଇଥିଲେ । ଏନେଇ ସେ କହିଛନ୍ତି ଠିକ୍ ନିର୍ଣ୍ଣୟ ନିଆଯାଇଛି । କାରଣ ମଇଦାନକୁ ଓହ୍ଲାଇବା ପାଇଁ ମଧ୍ୟ ପରିସ୍ଥିତି ଠିକ୍ ନଥିଲା । ବର୍ଷା ପାଇଁ ବାରମ୍ବାର ମ୍ୟାଚ ବାତିଲ ହେଉଛି । ଏନେଇ ବଟଲର କହିଛନ୍ତି "ମୁଁ ନିରାଶ ଅଛି । ଆମେ ସମସ୍ତ ମ୍ୟାଚ ଶେଷ ଯାଏଁ ଖେଳିବାକୁ ଚାହୁଁଛୁ । ହେଲେ ଦୁର୍ଭାଗ୍ୟବଶତଃ ଆମର ଦୁଇଟି ମ୍ୟାଚ ବେଶ୍ ପ୍ରଭାବିତ ହୋଇଛି । ଆମେ ଏମିତି ଚାହୁଁ ନାହୁଁ କି ଆମ ମ୍ୟାଚରେ ଆମେ ଏମିତି ପରିଣାମ ଭୋଗିବାରୁ ପଡୁ । ହେଲେ ଆପଣ ଦୁନିଆରେ କେଉଁଠାରେ ବି ଖେଳନ୍ତୁ ବର୍ଷା ଆସିବ ତ ଏମିତି ସ୍ଥିତି ଉପୁଜିବ ।
ଗ୍ରୁପ ୧ ପଏଣ୍ଟ ଟେବୁଲରେ ଇଂଲଣ୍ଡର ୩ ପଏଣ୍ଟ ସହିତ ରନ୍ ରେଟ୍ +0.239 ରହିଛି । ଏହା ସହିତ ଇଂଲଣ୍ଡ ପଏଣ୍ଟ ଟେବୁଲରେ ଦ୍ବିତୀୟ ସ୍ଥାନରେ ରହିଛି । ଇଂଲିସ ଟିମ ଏପର୍ଯ୍ୟନ୍ତ ତିନୋଟି ମ୍ୟାଚ ଖେଳିସାରିଛି । ଗ୍ରୁପ ୧ କୁ ଗ୍ରୁପ ଅଫ ଡେଥ କୁହାଯାଉଛି । ସେମିରେ ପ୍ରବେଶ ପାଇଁ ସବୁ ଦଳ ଅପ୍ରାଣ ଉଦ୍ୟମ କରିବେ । ଗ୍ରୁପ ପଏଣ୍ଟ ଟେବୁଲରେ ଶୀର୍ଷ ଦୁଇଟି ଦଳ ଟି୨୦ ବିଶ୍ବକପ ସେମିଫାଇନାଲ ଖେଳିବା ପାଇଁ ଯୋଗ୍ୟତା ହାସଲ କରିବେ । ସେପଟେ ନ୍ୟୁଜିଲାଣ୍ଡ ୫ ପଏଣ୍ଟ ହାସଲ କରି ଗ୍ରୁପ ୧ ପଏଣ୍ଟ ଟେବୁଲରେ ଶୀର୍ଷରେ ରହିଛି ।
