ନୂଆଦିଲ୍ଲୀ: ସଂସଦର ଉଭୟ ଗୃହରେ ଐତିହାସିକ ମହିଳା ସଂରକ୍ଷଣ ବିଲ୍ ପାସ୍ ପରେ ଉତ୍ସବ ମୁଖର ହୋଇପଡିଛି ବିଜେପି ଶିବିର । ରାଜଧାନୀ ଦିଲ୍ଲୀ ସ୍ଥିତ ପାର୍ଟି ମୁଖ୍ୟାଳୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦଳୀୟ ନେତା ମନ୍ତ୍ରୀମାନେ ଜୋରଦାର ସ୍ବାଗତ କରିଛନ୍ତି । ଉଭୟ ଗୃହରେ ସର୍ବସମ୍ମତି କ୍ରମେ ବିଲ୍ ପାରିତ ହେବା ନେଇ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛି ବିଜେପି ମହିଳା ମୋର୍ଚ୍ଚା । ଏହି ଅବସରରେ ପ୍ରଧାନମନ୍ତ୍ରୀ ଦେଶର ସବୁ ମହିଳାମାନଙ୍କୁ ଅଭିନନ୍ଦନ ଜଣାଇ କହିଛନ୍ତି, "କାଲି(20) ଏବଂ ପରଦିନ(21 ତାରିଖ) ଆମେ ନୂଆ ଇତିହାସ ସୃଷ୍ଟି ହେବାର ଦେଖୁଛୁ । କୋଟି କୋଟି ଜନତା ଏହି ଇତିହାସ ରଚିବାକୁ ସୁଯୋଗ ଦେବା ଆମ ପାଇଁ ସୌଭାଗ୍ୟର ବିଷୟ । ଏଥିପାଇଁ ସବୁ ମାଆ ଓ ଭଉଣୀମାନଙ୍କୁ ଅଭିନନ୍ଦନ ଜଣାଉଛି ।"
ଏହାମଧ୍ୟ ପଢନ୍ତୁ: Women's Reservation Bill: ସଂସଦର ଉଭୟ ଗୃହରେ ପାରିତ, ରାଜ୍ୟସଭାରେ ମିଳିଲା ପୂର୍ଣ୍ଣ ଭୋଟ
ପ୍ରଧାନମନ୍ତ୍ରୀ ଆଗକୁ କହିଛନ୍ତି,"ଏହି ମହିଳା ସଂରକ୍ଷଣ ବିଲ୍ ପଥରେ ଅନେକ ବାଧାବିଘ୍ନ ଥିଲା । ମହତ୍ ଉଦ୍ଦେଶ୍ୟ ଏବଂ ପ୍ରୟାସରେ ପାରଦର୍ଶିତା ଥିଲେ ସବୁ ବାଧାକୁ ଅତିକ୍ରମ କରି ସଫଳତା ହାସଲ କରିହେବ । ଏହା ନିଜର ଭିତରେ ଗୋଟିଏ ରେକର୍ଡ । ଏହି ଐତିହାସିକ ବିଲକୁ ସଂସଦରେ ପୂର୍ଣ୍ଣ ସମର୍ଥନ ମିଳିଛି । ଏଥିପାଇଁ ମୁଁ ସବୁ ରାଜନୈତିକ ଦଳ ଓ ସାଂସଦଙ୍କୁ ଧନ୍ୟବାଦ ଜଣାଉଛି । ନାରୀ ଶକ୍ତି ବନ୍ଦନ ଅଧିନିୟମ ବା ମହିଳା ସଂରକ୍ଷଣ ବିଲ୍ ପାସ୍ ନେଇ ବିଜେପି ମହିଳା ମୋର୍ଚ୍ଚା ମଧ୍ୟ ପ୍ରଧାନମନ୍ତ୍ରୀ ମୋଦିଙ୍କୁ ଅଶେଷ କୃତଜ୍ଞତା ଜଣାଇଛନ୍ତି ।"
ମହିଳା ସଂରକ୍ଷଣ ବିଲ୍ ବୁଧବାର ଦିନ ଲୋକସଭାରେ ଗୃହୀତ ହେବା ପରେ ସଂସଦ ସ୍ବତନ୍ତ୍ର ଅଧିବେଶନର ଚତୁର୍ଥ ଦିନରେ ଗତକାଲି(ଶୁକ୍ରବାର) ରାଜ୍ୟସଭାରେ ଆଗତ ହୋଇଥିଲା । ଦିନ ତମାମ ଚର୍ଚ୍ଚା ପରେ ରାତିରେ ଭୋଟିଂ ମାଧ୍ୟମରେ ଏହି ବିଲ୍ ରାଜ୍ୟସଭାରେ ପାରିତ ହୋଇଥିଲେ । ବିଲ୍ ସପକ୍ଷରେ ମୋଟ ୨୧୫ ସଦସ୍ୟ ମତଦାନ କରିଥିବା ବେଳେ ବିପକ୍ଷରେ କୌଣସି ଭୋଟ ପଡିନଥିଲା । ଏହି ବିଲ୍ ଅନୁସାରେ ବିଧାନସଭା ଓ ଲୋକସଭାରେ ମହିଳାଙ୍କୁ ୩୩ ପ୍ରତିଶତ ସଂରକ୍ଷଣ ମିଳିବ । ବିଲ୍ ପାରିତ ହେବାପରେ ସଂସଦର ଉଭୟ ଗୃହକୁ ଅନିର୍ଦ୍ଧିଷ୍ଟ କାଳ ଯାଏଁ ସ୍ଥଗିତ ରଖାଯାଇଥିଲା ।
ଏହି ସଫଳତା ପାଇଁ ଆଜି ଦିଲ୍ଲୀ ସ୍ଥିତ ଭାରତୀୟ ଜନତା ପାର୍ଟି କାର୍ଯ୍ୟାଳୟ ବାହାରେ ଦଳର କର୍ମକର୍ତ୍ତା ବାଜା ବଜାଇ ଉତ୍ସବ ମନାଇଛନ୍ତି । ବିଜେପି ମହିଳା ମୋର୍ଚ୍ଚା ସଦସ୍ୟ ଓ ନେତାମାନେ ଏକାଠି ହୋଇ ପ୍ରଧାନମନ୍ତ୍ରୀଙ୍କ ସ୍ବାଗତ କରିଛନ୍ତି ।
