ପାଟନା:ବିରୋଧି ଦଳ ଗୁଡିକର ତୀବ୍ର ବିରୋଧ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ନୂତନ ସଂସଦ ଭବନର ଲୋକାର୍ପଣ କରିଛନ୍ତି । ନୂଆ ସଂସଦର ଲୋକାର୍ପଣ ହେଉ ହେଉ ପୁଣିଥରେ ନୂଆ ବିବାଦ ସାମ୍ନାକୁ ଆସିଛି । ଲାଲୁ ଯାଦବଙ୍କ ରାଷ୍ଟ୍ରୀୟ ଜନତା ଦଳର (RJD) ଏକ ଟ୍ବିଟ୍ ବିବାଦ ବଢାଇଛି । ନୂତନ ସଂସଦ ଭବନର ଡିଜାଇନକୁ କଫିନ ସହିତ ତୁଳନା କରିଛି ଆରଜେଡି । ଏନେଇ ଦଳ ଟ୍ବିଟର ହ୍ୟାଣ୍ଡେଲରେ ସଂସଦ ଭବନ ଓ କଫିନ ଏକ ଫଟୋ ପୋଷ୍ଟ କରି ଏହା କ'ଣ ବୋଲି ପ୍ରଶ୍ନ କରିଛି । ଯାହାକୁ ନେଇ ଏବେ ବିଜେପି ଓ ଆରଜେଡି ମୁହାଁମୁହିଁ ହୋଇଛନ୍ତି ।
ଆରଜେଡି ନେତା ଶକ୍ତି ସିଂ ଯାଦବ କହିଛନ୍ତି, ''ଆମ ପକ୍ଷରୁ କଫିନର ଯେଉଁ ଚିତ୍ର ଟ୍ବିଟ୍ କରାଯାଇଛି, ତାହା ଦେଶର ଗଣତନ୍ତ୍ରକୁ କବର ଦିଆଯାଇଛି ବୋଲି ଦର୍ଶାଉଛି । ଦେଶବାସୀ ଏହାକୁ କେବେ ଗ୍ରହଣ କରିବେ ନାହିଁ । ସଂସଦ ଗଣତନ୍ତ୍ରର ମନ୍ଦିର, ଯେଉଁଠି ଆଲୋଚନା ହୁଏ ।'' ଆରଜେଡିର ଏପରି ଟ୍ବିଟରେ କଡା ଜବାବ ଦେଇ ବିଜେପି ନେତା ସୁଶୀଲ ମୋଦି କହିଛନ୍ତି, ନୂତନ ସଂସଦ ଭବନକୁ କଫିନ ସହ ତୁଳନା କରିଥିବା ଲୋକ ବିରୋଧରେ ଦେଶଦ୍ରୋହ ମାମଲା ରୁଜୁ କରାଯିବା ଉଚିତ୍ ।
ଏହାମଧ୍ୟ ପଢନ୍ତୁ: ଭାରତର ଆତ୍ମା ନୂଆ ସଂସଦ ଭବନ ଲୋକାର୍ପଣ କଲେ ପ୍ରଧାନମନ୍ତ୍ରୀ