ମୁମ୍ବାଇ: ମହାରାଷ୍ଟ୍ର ରାଜନୀତିରେ ଘଡିକେ ଘୋଡା ଛୁଟୁଛି । ଗୋଟିଏ ପଟେ କ୍ଷମତାର ସନ୍ତୁଳନ ଟଳମଳ ହେଉଥିବାବେଳେ ମାମଲା ଦିନକୁ ଦିନ ନୂଆ ମୋଡ ନେବାରେ ଲାଗିଛି । ସଙ୍କଟ ସମାଧାନ କିମ୍ବା ଅନ୍ତ ହେବା ପରିବର୍ତ୍ତେ ସର୍ବୋଚ୍ଚ କୋର୍ଟରେ ପହଞ୍ଚିଛି । ବିଦ୍ରୋହୀ ବିଧାୟକଙ୍କୁ ମହାରାଷ୍ଟ୍ର ଉପ ବାଚସ୍ପତି ଜାରି କରିଥିବା ଅଯୋଗ୍ୟ ଘୋଷଣା ନୋଟିସକୁ ସର୍ବୋଚ୍ଚ କୋର୍ଟରେ ଚ୍ୟାଲେଞ୍ଜ କରିଛନ୍ତି ବିଦ୍ରୋହୀ ବିଧାୟକ ଗୋଷ୍ଠୀର ନେତୃତ୍ବ ନେଉଥିବା ତଥା ଏହି ମହାଡ୍ରାମାର କେନ୍ଦ୍ର ଚରିତ୍ର ଏକନାଥ ସିନ୍ଧେ । ଏହି ମାମଲାରେ ସର୍ବୋଚ୍ଚ କୋର୍ଟ ହସ୍ତକ୍ଷେପ ନେଇ ପିଟିସନ ଦାଏର କରିଛନ୍ତି ସିନ୍ଧେ ।
ଗତକାଲି ସିନ୍ଧେଙ୍କ ଗୋଷ୍ଠୀରେ ତଥା ଗୌହାଟୀରେ ଥିବା 16 ଶିବସେନା ବିଧାୟକଙ୍କୁ ଅଯୋଗ୍ୟ ଘୋଷଣା କରିବା ନେଇ ନୋଟିସ ଜାରି କରିଥିଲେ ମହାରାଷ୍ଟ୍ର ଉପ ବାଚସ୍ପତି । ସେମାନଙ୍କ ସଭ୍ୟପଦ କାହିଁକି ରଦ୍ଦ କରାଯିବ ନାହିଁ, ସେ ନେଇ ଉତ୍ତର ରଖିବାକୁ ବାଚସ୍ପତି ସମୟ ମଧ୍ୟ ଦେଇଥିଲେ । ଯାହାକୁ ନେଇ ମାମଲା ଏବେ କୋର୍ଟରେ ପହଞ୍ଚିଛି । ଏବେବି ବିଦ୍ରୋହୀ ବିଧାୟକମାନେ ଗୌହାଟୀର ଏକ ପଞ୍ଚ ତାରାକା ହୋଟେଲରେ ରହିଛନ୍ତି । ସେମାନେ ନୂଆ ଦଳ ଗଠନ କରିବା ନେଇ ମଧ୍ୟ ଚେତାବନୀ ଦେଇ ସାରିଛନ୍ତି । ଦଳର ନାମ ‘ଶିବସେନା ବାଲାସାହେବ’ ରଖାଯିବା ନେଇ ମଧ୍ୟ ବିଦ୍ରୋହୀ ଗୋଷ୍ଠୀଙ୍କ ପକ୍ଷରୁ ସଙ୍କେତ ମିଳିଛି ।