ହାଇଦ୍ରାବାଦ:ଆତଙ୍କବାଦ ପ୍ରସଙ୍ଗରେ ଭାରତ-କାନାଡା ମଧ୍ୟରେ ଜାରି ରହିଥିବା ତିକ୍ତତା ଉପରେ ସାରା ବିଶ୍ବର ନଜର ରହିଥିବା ବେଳେ ଆଜି (ମଙ୍ଗଳବାର) ଜାତିିସଂଘକୁ ସମ୍ବୋଧିତ କରିଛନ୍ତି ବୈଦେଶିକ ମନ୍ତ୍ରୀ ଏସ.ଜୟଶଙ୍କର । ଆଜି ଜାତିସଂଘ ସାଧାରଣ ସଭାକୁ ସମ୍ବୋଧିତ କରି ଭାରତର ଉପଲବ୍ଧି ସହ ବିଭିନ୍ନ ବୈଶ୍ବିକ ପ୍ରସଙ୍ଗ ଉଠାଇଛନ୍ତି ଜୟଶଙ୍କର । ଜୟଶଙ୍କର ଆଜି ଜାତିସଂଘରୁ ହିଁ କାନାଡାର ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋଙ୍କୁ ଆତଙ୍କବାଦ ପ୍ରସଙ୍ଗରେ କଡା ଜବାବ ଦେଇଛନ୍ତି । ଆତଙ୍କବାଦ କିମ୍ବା ଉଗ୍ରବାଦକୁ ରାଜନୈତିକ ସୁବିଧା ପ୍ରଦାନ କରିବା ସପକ୍ଷରେ କୌଣସି ଦେଶର ପ୍ରତିକ୍ରିୟା ହୋଇପାରିବ ନାହିଁ ବୋଲି ଜୟଶଙ୍କର କହିଛନ୍ତି ।
ଆଜି ସମ୍ବୋଧନରେ ‘ନମସ୍ତେ ଭାରତ’ ଶବ୍ଦରୁ ନିଜ ଅଭିଭାଷଣ ଆରମ୍ଭ କରିଥିଲେ ଜୟଶଙ୍କର । ଏବେ ଜାରି ରହିଥିବା ଏହି ଦ୍ବିପାକ୍ଷିକ ବିବାଦ ପ୍ରସଙ୍ଗରେ ଜୟଶଙ୍କର ସିଧା କାନାଡାର ଆଭିମୁଖ୍ୟ ଓ ପ୍ରଧାନମନ୍ତ୍ରୀ ଟ୍ରୁଡୋଙ୍କ ବୟାନକୁ ପରୋକ୍ଷରେ କଡା ସମାଲୋଚନା କରିଛନ୍ତି । କୌଣସି ଦେଶ ଆତଙ୍କବାଦ, ଉଗ୍ରବାଦ ଏବଂ ହିଂସାକୁ ରାଜନୈତିକ ସୁବିଧା ପ୍ରଦାନ କରିବା ଉଚିତ ନୁହେଁ । ଏପରି କରି କୌଣସି ଦେଶର ଆଞ୍ଚଳିକ ଅଖଣ୍ଡତା ଏବଂ ଆଭ୍ୟନ୍ତରୀଣ କାର୍ଯ୍ୟରେ ହସ୍ତକ୍ଷେପ ହୋଇପାରିବ ନାହିଁ ।
ବର୍ତ୍ତମାନ ବିଶ୍ୱରେ ଅଶାନ୍ତିର ଏକ ଅସାଧାରଣ ସମୟ ଦେଖାଦେଇଛି । ଭାରତର ‘ଗୋଟିଏ ବିଶ୍ବ ଗୋଟିଏ ପରିବାର’ ଏକ ଭବିଷ୍ୟତ ଦର୍ଶନ କେବଳ ଅଳ୍ପ କେତେକଙ୍କ ପାଇଁ ସାମାନ୍ୟ ଲାଭର ପ୍ରସଙ୍ଗ ନୁହେଁ, ମାତ୍ର ଏହା ଅନେକଙ୍କ ଚିନ୍ତାଧାରାକୁ ଅନ୍ତର୍ଭୁକ୍ତ କରୁଛି । ସେହିପରି ସେ ପରିବର୍ତ୍ତିତ ବୈଶ୍ବିକ ସ୍ଥିତିରେ ଜାତିସଂଘ ସୁରକ୍ଷା ପରିଷଦ ନୀତିରେ ପରିବର୍ତ୍ତନ କଥା ମଧ୍ୟ ଉଠାଇଥିଲେ । ଭାରତକୁ ସୁରକ୍ଷା ପରିଷଦରେ ସ୍ଥାୟୀ ସଦସ୍ୟତା ଦେବା ପାଇଁ ଯେଉଁ ଦାବି ଦୀର୍ଘ ବର୍ଷ ହେବ ହୋଇଆସୁଛି, ତାକୁ ଆଜି ଜୟଶଙ୍କର ଜାତିସଂଘ ମଞ୍ଚରେ ଉଠାଇଛନ୍ତି ।