ନୂଆଦିଲ୍ଲୀ: ଆଜି ଭାରତୀୟ ଜାତୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲଙ୍କ ଅଧ୍ୟକ୍ଷତାରେ ୭ ରାଷ୍ଟ୍ରର NSAଙ୍କୁ ନେଇ ବସିଥିବା ଆଞ୍ଚଳିକ ସୁରକ୍ଷା ବୈଠକ ଶେଷ ହୋଇଛି । ଦିଲ୍ଲୀରେ ଆୟୋଜିତ ଏହି ଉଚ୍ଚସ୍ତରୀୟ ବୈଠକରେ ୭ଟି ରାଷ୍ଟ୍ରର ଜାତୀୟ ସୁରକ୍ଷା ପରାମର୍ଶଦାତା ସାମିଲ ହୋଇ ବିଭିନ୍ନ ଗିରିତ୍ବପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରିଛନ୍ତି । ତେବେ ଆଫଗାନିସ୍ତାନ ସଙ୍କଟ ଓ ଏହାର ପ୍ରଭାବ ଆଜିର ମୁଖ୍ୟ ପ୍ରସଙ୍ଗ ଭାବେ ଆଲୋଚିତ ହୋଇଛି ।
ଆଜିର ଏହି ବୈଠକରେ ଆଫଗାନିସ୍ତାନ ସଙ୍କଟ ଓ ବର୍ତ୍ତମାନ ସମୟରେ ବିଶ୍ବବ୍ୟାପୀ ଏହାର ପ୍ରଭାବ ସମ୍ପର୍କରେ ଆଲୋଚନା ହୋଇଥିଲା । ଗୃହଯୁଦ୍ଧଗ୍ରସ୍ତ ଆଫଗାନିସ୍ତାନର ବର୍ତ୍ତମାନ ରାଜନୈତିକ ପରିସ୍ଥିତି ଆତଙ୍କବାଦ ଏବଂ ମାନବିକ ସହାୟତାର ଆବଶ୍ୟକତା ଉପରେ ଚିନ୍ତା ପ୍ରକାଶ ପାଇଛି । ସେହିପରି ସେଠାରେ ମାନବାଧିକାର ସୁରକ୍ଷା ପାଇଁ ମୁକ୍ତ ଶାସନ ପ୍ରତିଷ୍ଠା ଦିଗରେ ଏହି ରାଷ୍ଟ୍ର ସମୂହ ମତ ବିନିମୟ କରିଛନ୍ତି । ଆଫଗାନିସ୍ତାନରେ ତାଲିବାନର କ୍ଷମତା ଦଖଲ ପରେ ସୃଷ୍ଟି ହୋଇଥିବା ହିଂସାତ୍ମକ ସ୍ଥିତି ଓ କୁଣ୍ଡୁଜ, କାନ୍ଦାହାର ଏବଂ କାବୁଲରେ ଲାଗିରହିଥିବା ଆତଙ୍କବାଦୀ ଆକ୍ରମଣକୁ ନିନ୍ଦା କରିଥିଲେ ଅଂଶଗ୍ରହଣକାରୀ ଦେଶର ପ୍ରତିନିଧି ।
ସେହିପରି କାବୁଲରେ ଏକ ଶାନ୍ତିପୂର୍ଣ୍ଣ, ନିରାପଦ ଏବଂ ସ୍ଥିର ଆଫଗାନିସ୍ତାନ ସରକାର ପାଇଁ ଦୃଢମତ ପ୍ରକାଶ ପାଇଥିବାବେଳେ ଆଫଗାନିସ୍ତାନର ସାର୍ବଭୌମତ୍ବ, ଏକତା, ଆଞ୍ଚଳିକ ଅଖଣ୍ଡତା ଏବଂ ଏହାର ଆଭ୍ୟନ୍ତରୀଣ କାର୍ଯ୍ୟରେ ହସ୍ତକ୍ଷେପ ନକରିବା ଉପରେ ମଧ୍ୟ ଆଲୋଚନା ହୋଇଛି । ସେହିପରି ବିଧ୍ବସ୍ତ ସ୍ଥିତିର ଫାଇଦା ନେଇ କୌଣସି ଆତଙ୍କବାଦୀ କାର୍ଯ୍ୟକଳାପକୁ ଆଶ୍ରୟ, ତାଲିମ, ଯୋଜନା କିମ୍ବା ଆର୍ଥିକ ସହାୟତା ପାଇଁ ଆଫଗାନିସ୍ତାନର ଯୁଦ୍ଧଗ୍ରସ୍ତ ଅଞ୍ଚଳ କିପରି ବ୍ୟବହାର ନ କରାଯିବା ତା ଉପରେ ମଧ୍ୟ ଗୁରୁତ୍ବାରୋପ କରିଛନ୍ତି ଅଂଶଗ୍ରହଣକାରୀ ଦେଶର ସୁରକ୍ଷା ପରାମର୍ଶଦାତା ମଣ୍ଡଳୀ ।