ହାଇଦ୍ରାବାଦ: ଦିଲ୍ଲୀରେ ପ୍ରଶାସନିକ କ୍ଷମତାକୁ ନେଇ ତେଜୁଛି ରାଜନୀତି । ଦିଲ୍ଲୀର ପ୍ରଶାସନିକ ନିୟନ୍ତ୍ରଣ ପାଇଁ କେନ୍ଦ୍ର ଆଣିଥିବା ଅଧ୍ୟାଦେଶକୁ ନେଇ ବିରୋଧୀଙ୍କ ସହଯୋଗ ଲୋଡିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ଏହି କ୍ରମରେ କେଜ୍ରିୱାଲ ୟୁପିରେ ପହଞ୍ଚି ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ସହ ଭେଟ କରିଥିଲେ । ଏହି ଅଧ୍ୟାଦେଶକୁ ରାଜ୍ୟ ସଭାରେ ପାରିତ ନକରିବା ପାଇଁ ଅଖିଳେଶଙ୍କ ଠାରୁ ସହାୟତା ଲୋଡିଥିଲେ କେଜ୍ରିୱାଲ । କେଜ୍ରିୱାଲ କହିଥିଲେ,‘‘ ଦିଲ୍ଲୀର ଜନତା ଭୋଟ ଦେଇ ସରକାର ଗଠନ କରିଛନ୍ତି । କିନ୍ତୁ ସେ ସରକାର ପାଖରେ ନିଷ୍ପତ୍ତି ନେବାର ଅଧିକାର ରହିବ ନାହିଁ । ଦିଲ୍ଲୀବାସୀଙ୍କ କଲ୍ୟାଣ ପାଇଁ ସରକାର କିଛି କରିପାରିବ ନାହିଁ । ତାହାଲେ ଦିଲ୍ଲୀବାସୀଙ୍କ ଭୋଟର ମୂଲ୍ୟ କ’ଣ । କେନ୍ଦ୍ରର ଏକଛତ୍ରବାଦୀ ନୀତି ଦ୍ବାରା ହନ୍ତସନ୍ତ ହେବେ ଦିଲ୍ଲୀବାସୀ । ଏହି ଅଧ୍ୟାଦେଶ ଦିଲ୍ଲୀବାସୀଙ୍କ ପାଇଁ ମଙ୍ଗଳମୟ ନୁହେଁ ।’’
ଏହାପରେ କେଜ୍ରିୱାଲଙ୍କୁ ପୂର୍ଣ୍ଣ ସହଯୋଗ ଦେବା ନେଇ ଅଖିଳେଶ ପ୍ରତିଶୃତି ଦେଇଛନ୍ତି । ଏହାସହ କେନ୍ଦ୍ର ସରକାରର ମନମୁଖୀକୁ ନେଇ ଅଖିଳେଶ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି । ଅଖିଳେଶ କେନ୍ଦ୍ର ସରକାରଙ୍କୁ ଟାର୍ଗେଟ କରି କହିଛନ୍ତି, ‘‘କେନ୍ଦ୍ର ମୋଦି ସରକାର କ୍ଷମତା ଲୋଭୀ । ନିଜ କ୍ଷମତାର ଲାଳସାକୁ ପୂର୍ଣ୍ଣ କରିବା ପାଇଁ ଦିଲ୍ଲୀ ସରକାରଙ୍କ କ୍ଷମତା ତାଙ୍କ ଠାରୁ ଛଡେଇ ନବାକୁ ବସିଛି । କେନ୍ଦ୍ର ଦିଲ୍ଲୀରେ ସରକାର, ପ୍ରଶାସନିକ ଅଧିକାର, ପ୍ରଶାସନିକ ଅଧିକାରୀ ସମସ୍ତଙ୍କୁ ନିଜ ଅକ୍ତିଆରେ କରିବା ପାଇଁ ଏପରି ଏକ ଚକ୍ରାନ୍ତ କରୁଛି । ଏହି ଅଧ୍ୟାଦେଶ ନିନ୍ଦନୀୟ । ଏହାକୁ ଗ୍ରହଣ କରାଯାଇ ପାରିବନାହିଁ। ଯଦି କୌଣସି ଅଫିସର ଦୁର୍ନୀତିଗ୍ରସ୍ତ ଥାଏ, କିମ୍ବା ପ୍ରଶାସନିକ କ୍ଷେତ୍ରରେ ପରିବର୍ତ୍ତନ କରିବାର କ୍ଷମତା ରାଜ୍ୟ ସରକାରଙ୍କ ପାଖରେ ରହିବା ଦରକାର । ନା କି ରାଜ୍ୟପାଳଙ୍କ ନିକଟରେ । କେନ୍ଦ୍ରର ଏହି କାର୍ଯ୍ୟକୁ ଆମେ ନିନ୍ଦା କରିବା ସହ ଏହାକୁ ପାସ ନକରିବା ପାଇଁ ସମାଜବାଦୀ ପାର୍ଟି ସହଯୋଗ କରିବ’’ । ଦିଲ୍ଲୀ ସରକାର ଦିଲ୍ଲୀବାସୀଙ୍କ ପାଇଁ ଯେଉଁ କାର୍ଯ୍ୟ କରିଛନ୍ତି ତାକୁ ନେଇ କେନ୍ଦ୍ର ସରକାରଙ୍କ ଚିନ୍ତା ବଢି ଯାଇଛି । ଯାହାଫଳରେ ସେ ଏପରି ଏକ ଅଡିନାନ୍ସ ପାସ କରିବାକୁ ଚେଷ୍ଟା କରୁଛି ।