ପରିବାର କଥା ଯେତେବେଳେ ମନକୁ ଆସେ ଆଜିକାଲି ପିଲାମାନେ ବୁଝନ୍ତି ମା, ବାପା, ଭାଇ, ଭଉଣୀ । ଗୋଟିଏ ପିଢ଼ି ପଛକୁ ଫେରିଲେ ପରିବାରର ମାନେ ଥିଲା ବାପା, ମା, ଭାଇ, ଭଉଣୀ, ଜେଜେ, ଜେଜେ ମା । ଆଉ କିଛି ପିଢ଼ି ପଛକୁ ଫେରିଲେ ଦେଖିବାକୁ ମିଳେ ଯୌଥ ପରିବାରର ପ୍ରଥା ଯେଉଁଠି, ଜେଜେ, ଜେଜେ ମା, ବାପା, ମା, ଦାଦା, ଖୁଡ଼ି, ବଡ ବାପା, ବଡ଼ ମା, ଭାଇ ଭଉଣୀଙ୍କ ମେଳରେ ପୁରିଉଠୁଥିଲା ଘର । କିନ୍ତୁ ଆଜିର ଏହି ଏକବିଂଶ ଶତାବ୍ଦୀରେ ପରିବାର କହିଲେ ଏକକ ପରିବାର ବା ନ୍ୟୁକ୍ଲିୟର ଫ୍ୟାମିଲିକୁ ବୁଝାଏ । ତେବେ ଏହି ଯୁଗରେ ବି ଭାରତରେ ଅଛି ଏମିତି ଏକ ପରିବାର ଅଛି ଯାହାର ସଦସ୍ୟ ସଂଖ୍ୟା 167 । କଥାଟା ଆଶ୍ଚର୍ଯ୍ୟ ଲାଗୁଥିଲେ ବି ସତ ।
ମିଜୋରାମର ଜଣେ ବ୍ୟକ୍ତି ଯାହାଙ୍କର ଅଛନ୍ତି 39 ଜଣ ପତ୍ନୀ, 94 ସନ୍ତାନ ଓ 33 ନାତି ନାତୁଣୀ । ବିଶ୍ବର ସର୍ବ ବୃହତ ପରିବାର ମଧ୍ୟରୁ ଗୋଟିଏ । ଆଉ ଗୋଟଏ ଛାତ ତଳେ ଏମାନେ ବେଶ୍ ଖୁସିରେ ରହୁଛନ୍ତି । ବର୍ମା ଓ ବାଂଲାଦେଶ ସୀମାରେ ଏକ ଚାରି ମହଲା ବିଶିଷ୍ଟ କୋଠାରେ ରହେ ଏହି ପରିବାର ।
ପରିବାରର ମୁଖ୍ୟ ଜିଓନା ଚାନା କୁହନ୍ତି, ‘‘ଗୋଟିଏ ବର୍ଷରେ ମୁଁ 10 ଜଣ ମହିଳାଙ୍କୁ ବିବାହ କରିଥିଲି ।’’ ଜିଓନାଙ୍କ ପୁଅ ବୋହୂ ଓ ତାଙ୍କ ନାତି ନାତୁଣି ଗୋଟିଏ ଘରେ ଭିନ୍ନ ଭିନ୍ନ ରୁମରେ ରହନ୍ତି । କିନ୍ତୁ ଏତେ ବଡ଼ ପରିବାରର ରୋଷେଇ ଘର ଆଜିବି ଗୋଟିଏ ।