ନୂଆଦିଲ୍ଲୀ:ଆର୍ଥିକ ଠକେଇ ମାମଲାରେ ଜେଟ ଏୟାରଓ୍ବେଜର 538 କୋଟି ଟଙ୍କାର ସମ୍ପତ୍ତି ଜବତ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଏହି ଜବତ ସମ୍ପତ୍ତି ମଧ୍ୟରେ 17ଟି ଫ୍ଲାଟ, ବଙ୍ଗଳା ଓ କମର୍ସିଆଲ ବିଲ୍ଡିଂ ଓ ଅନ୍ୟ ସମ୍ପତ୍ତି ମଧ୍ୟ ରହିଛି । ଏୟାରଲାଇନ୍ସ କମ୍ପାନୀ ଓ ଏହାର ପ୍ରତିଷ୍ଠାତା ନରେଶ ଗୋଏଲଙ୍କ ମାଲିକାନାରେ ପଞ୍ଜିକୃତ ହୋଇଥିବା ଏହି ସମସ୍ତ ସମ୍ପତ୍ତିକୁ କେନ୍ଦ୍ରୀୟ ସଂସ୍ଥା ଜବତ କରିଛି ।
2002 PMLA ଆକ୍ଟ ଅନୁସାରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ପ୍ରାଥମିକ ଭାବେ ସୂଚନା ମିଳିଛି । ଏହି ସମ୍ପତ୍ତି ଏୟାରଓ୍ବେଜ କମ୍ପାନୀ, ନରେଶଙ୍କ ନିଜ ନାମ, ପତ୍ନୀ ଅନିତା ଗୋଏଲ ଓ ପୁଅ ନିବାନ ଗୋଏଲଙ୍କ ନାମରେ ଦେଶ ଓ ଦେଶ ବାହାରେ ଥିଲା । ଦେଶର ଏକାଧିକ ସହର ସମେତ ଲଣ୍ଡନ ଓ ଦୁବାଇରେ ମଧ୍ୟ ଥିବା ସମ୍ପତ୍ତି ଜବତ ହୋଇଛି । ସଂସ୍ଥା ବିରୋଧରେ ଏବେ ଆର୍ଥିକ ହେରଫେର ବା ମନିଲଣ୍ଡ୍ରିଂ ମାମଲାର ତଦନ୍ତ ଜାରି ରହିଛି । ସଂସ୍ଥାର ପ୍ରତିଷ୍ଠାତା ନରେଶ ଗୋଏଲ ଏବେ ଗିରଫ ହୋଇ ଜେଲରେ ରହିଛନ୍ତି ।
ଗତକାଲି (ମଙ୍ଗଳବାର) କେନ୍ଦ୍ରୀୟ ସଂସ୍ଥା ଇଡି କାନାଡା ବ୍ୟାଙ୍କ ପକ୍ଷରୁ ହୋଇଥିବା ଅଭିଯୋଗ ଅନୁସାରେ, ନରେଶ ଗୋଏଲଙ୍କ ସମେତ ଅନ୍ୟ 5 ଜଣଙ୍କ ନାମରେ ଚାର୍ଜସିଟ ଦାଖଲ କରିଛି । କାନାଡା ବ୍ୟାଙ୍କର ଅଭିଯୋଗ ଅନୁସାରେ, ଏବେ ଅଚଳ ହୋଇପଡିଥିବା ଏହି ବେସରକାରୀ ବିମାନ କମ୍ପାନୀକୁ 848 କୋଟି ପର୍ଯ୍ୟନ୍ତ ଋଣ ସୀମା ଓ ଋଣ ମଞ୍ଜୁର କରାଯାଇଥିଲା । ସେଥିମଧ୍ୟରୁ ଏବେ ସୁଦ୍ଧା 838 କୋଟିର ଋଣ ବକେୟା ରହିଛି । କମ୍ପାନୀ ତାହା ପରିଶୋଧ କରିବା ସ୍ଥିତିରେ ନାହିଁ ।