ମୁଁ ବାହାର ଲୋକ ନୁହେଁ, ୧୫ ବର୍ଷ ହେଲା ସ୍ୱାମୀ ଲୋକଙ୍କ ସହ ଅଛନ୍ତି: ସିମୁଳିଆ ପ୍ରାର୍ଥିନୀ - Odisha Assembly Election 2024
Published : May 1, 2024, 9:53 AM IST
ବାଲେଶ୍ୱର: ନିର୍ବାଚନ ତାରିଖ ପାଖଉଥିବା ବେଳେ ବାଲେଶ୍ୱର ଜିଲ୍ଲା ସିମୁଳିଆ ନିର୍ବାଚନ ମଣ୍ଡଳୀରେ ରାଜନୈତିକ ଉଷ୍ମତା ବଢିବାରେ ଲାଗିଛି । ଦୁଇ ଥର ବିଧାୟକ ଜ୍ୟୋତି ପ୍ରକାଶ ପାଣିଗ୍ରାହୀଙ୍କ ଉପରେ ଚଳିତ ବର୍ଷ ବିଜେଡି ଆସ୍ଥା ପ୍ରକଟ ନକରି ମହିଳା କାର୍ଡ ଖେଳିଛି । ସମାଜସେବୀ ଶଶୀକୁମାର ସାହୁଙ୍କ ପତ୍ନୀ ସୁବାସିନୀ ସାହୁଙ୍କୁ ପ୍ରାର୍ଥୀ କରିଛି ଦଳ । ସୁବାସୀନିଙ୍କ ନାମ ଘୋଷଣା ପରେ ଜ୍ୟୋତି ପ୍ରକାଶ ପାଣିଗ୍ରାହୀଙ୍କ ସମର୍ଥକମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖିବାକୁ ମିଳିଥିଲା । ପ୍ରାର୍ଥୀ ବଦଳାଇବା ପାଇଁ ଜ୍ୟୋତିଙ୍କ ସମର୍ଥକମାନେ ମେଳି ବାନ୍ଧିଥିବା ବେଳେ ପୁଣି ସେମାନଙ୍କ ମଧ୍ୟରେ କିଛି ନେତା ଓ କର୍ମୀ ମନ ବୁଝେଇ ନେଇଥିବା ଧୋବାଗଡ଼ିଆ ନିର୍ବାଚନୀ ସଭାରେ ଦେଖାଯାଇଥିଲା । ତେବେ ଦଳୀୟ ନେତାଙ୍କ ଅସନ୍ତୋଷ ମଧ୍ୟରେ ଜଣେ ମହିଳା ପ୍ରାର୍ଥୀ ଭାବେ କେମିତି ନିର୍ବାଚନୀ ବୈତରଣୀ ପାର୍ ହେବେ ଏବଂ କ'ଣ ରଣନୀତି ରହିବ, ସେନେଇ ଇଟିଭି ଭାରତ ପ୍ରତିନିଧି ସୁବାସିନୀ ସାହୁଙ୍କ ସହ ଆଲୋଚନା କରିଛନ୍ତି । ଗାଁ ଗହଳିରେ ଲୁଚି ଯାଉଥିବା ପ୍ରତିଭାମାନଙ୍କ ବିକାଶ ପାଇଁ ଚେଷ୍ଟା କରିବେ ଏବଂ ବିଧାୟିକା ହେଲେ ସିଧାସଳଖ ଗ୍ରାଉଣ୍ଡ ଜିରୋରେ ଲୋକମାନଙ୍କ ସମସ୍ୟା ବୁଝିବେ ବୋଲି ପ୍ରକାଶ କରିଛନ୍ତି ବିଜେଡି ପ୍ରାର୍ଥିନୀ ।
ଅନ୍ୟପଟେ ବିରୋଧୀମାନେ ତାଙ୍କୁ ସିମୁଳିଆ ନିର୍ବାଚନ ମଣ୍ଡଳୀର ଲୋକ ନୁହଁନ୍ତି ବୋଲି ଆକ୍ଷେପ କରୁଥିବା ବେଳେ ସୁବାସିନୀ କହିଛନ୍ତି ଯେ, ଦୀର୍ଘ ୧୫ ବର୍ଷ ହେଲାଣି ତାଙ୍କ ସ୍ବାମୀ ଶଶୀକୁମାର ସିମୁଳିଆ ଏବଂ ଖଇରା ଅଞ୍ଚଳର ଲୋକମାନଙ୍କ ସହ ରହିଛନ୍ତି । ଜଣେ ସମାଜସେବୀ ଭାବେ ସବୁବେଳେ ସିମୁଳିଆ ନିର୍ବାଚନ ମଣ୍ଡଳୀର ଲୋକଙ୍କ ସୁଖଦୁଃଖରେ ସାମିଲ ହୋଇଛନ୍ତି । ଏତେ ଦିନ ଯେଉଁ ବ୍ୟକ୍ତି ଲୋକମାନଙ୍କ ସହ ଅଛନ୍ତି ସେ କେମିତି ବାହାର ଲୋକ ହେଲେ ବୋଲି ପ୍ରଶ୍ନ କରିଛନ୍ତି ସୁବାସିନୀ । ଏଥିସହ ଅସନ୍ତୁଷ୍ଟ ଦଳୀୟ ନେତା ଓ କର୍ମୀମାନଙ୍କୁ ବ୍ୟକ୍ତିଗତ ଭାବେ ଭେଟି ସେମାନଙ୍କ ହାତ ଧରି ନିର୍ବାଚନୀ ପ୍ରଚାର କରିବେ ବୋଲି କହିଛନ୍ତି ।
ଇଟିଭି ଭାରତ, ବାଲେଶ୍ୱର