ସମ୍ବଲପୁର: ଧନୁପାଲି ଗୁଳିକାଣ୍ଡର ପର୍ଦ୍ଦାଫାସ । ଗତ 16 ତାରିଖରେ ସମ୍ବଲପୁର ଧନୁପାଲି ଥାନା ଅନ୍ତର୍ଗତ ଗୋବିନ୍ଦତୋଳା ଅଞ୍ଚଳରେ ଥିବା ପାୟଲ ଗହଣା ଦୋକାନରୁ ଦିନ ଦ୍ବିପ୍ରହରରେ ବନ୍ଧୁକ ମୁନରେ ଡକାୟତି ଉଦ୍ୟମ ଏବଂ ବ୍ୟବସାୟୀଙ୍କୁ ଗୁଳି ମାଡ଼ ଘଟଣ ଉପରୁ ଉଠିଲା ପରଦା । ଘଟଣାର ମାଷ୍ଟର ମାଇଣ୍ଡ ସହ ଜଣେ ସହଯୋଗୀଙ୍କୁ ଗିରଫ କରିଛି ସମ୍ବଲପୁର ପୋଲିସ । ସେମାନଙ୍କ ଠାରୁ 3ଟି ଦେଶୀ ବନ୍ଧୁକ,7ଟି ଅଫୁଟା ଗୁଳି, 2ଟି ବାଇକ ଓ ନଗଦ ଟଙ୍କା ସହ କିଛି ସୁନା ଅଳଙ୍କାର ଜବତ କରାଯାଇଛି ।ଏନେଇ ଆଜି ସମ୍ବଲପୁର ଏସପି ମୁକେଶ ଭାମୁ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ଏହି ଘଟଣାର ଗିରଫ ମୁଖ୍ୟ ଅଭିଯୁକ୍ତ ତଥା ମାଷ୍ଟର ମାଇଣ୍ଡ୍ ଜଣକ ହେଲେ ସଞ୍ଜୟ ସାହା । ତାଙ୍କ ଘର ବିହାରର ସମସ୍ତିପୁର ଅଞ୍ଚଳ ବୋଲି ଜଣା ପଡ଼ିଛି । ଅନ୍ୟ ଜଣେ ହେଲେ ଟିକେଶ୍ବର ସାହୁ । ତାଙ୍କ ଘର ବଲାଙ୍ଗୀର ହୋଇଥିବା ବେଳେ ସେ ସମ୍ବଲପୁରରେ ଭଡ଼ା ଘରେ ରହି ଆସୁଥିଲେ । ପୂର୍ବରୁ ଟିକେଶ୍ବର ନାଁରେ ଡକାୟତି ଏବଂ ଚୋରି ମାମଲା ରହିଥିବା ଏସପି କହିଛନ୍ତି । ତେବେ ଏହି ଡକାୟତି ଗ୍ୟାଙ୍ଗରେ 8 ଜଣ ସାମିଲ ଥିବାବେଳେ ଅନ୍ୟ 6 ଜଣ ବିହାର ରାଜ୍ୟର ଅଟନ୍ତି ବୋଲି ପୋଲିସ ସୂଚନା ଦେଇଛି । ସେମାନଙ୍କୁ ଧରିବା ପାଇଁ ପୋଲିସ ଚେଷ୍ଟା ଜାରି ରଖିଛି । ଏହି ଗ୍ୟାଙ୍ଗ ନାଁରେ ସମ୍ବଲପୁର ଜିଲ୍ଲାରେ 5ଟି ବରଗଡ଼ ଜିଲ୍ଲାରେ 3ଟି ମାମଲା ରହିଛି ।
ସୂଚନାଯୋଗ୍ୟ ଯେ, ଗତ 16 ତାରିଖରେ ଏହି ଡ଼କାୟତ ଗ୍ୟାଙ୍ଗ ସମ୍ବଲପୁର ଗୋବିନ୍ଦତୋଲାର ପାୟଲ ଜ୍ୱେଲେରୀର ମାଲିକ ସୁଜିତ ସ୍ବର୍ଣ୍ଣକାରଙ୍କୁ ଗୁଳି କରିଥିଲେ । ଏଥିରେ ସୁଜିତଙ୍କ ପେଟରେ ଗୁଳି ବାଜିଥିବା ବେଳେ ସେ ଗୁରୁତର ଆହତ ହୋଇଥିଲେ । ବର୍ତ୍ତମାନ ସେ ଭୁବନେଶ୍ବର ଏକ ହସ୍ପିଟାଲରେ ଚିକିତ୍ସାଧୀନ ଅଛନ୍ତି ।