ଭବାନୀପାଟଣା: କାନ୍ଧରେ ବୁହା ହେଲା ମୃତଦେହ । ପୁଣି ସାମ୍ନାକୁ ଆସିଲା ସ୍ବାସ୍ଥ୍ୟ ବିଭାଗର ନଗ୍ନ ଚିତ୍ର । ପଦାରେ ପଡ଼ିଲା ସରକାରଙ୍କ ଅପାରଗତା । ଘଟଣାଟି କଳାହାଣ୍ଡି ଜିଲ୍ଲା ଥୁଆମୁଲ ରାମପୁର ବ୍ଲକ ଅନ୍ତର୍ଗତ କାଠକୁରା ଗ୍ରାମର । ମହାପ୍ରାଣାୟ ଗାଡ଼ି ନମିଳିବାରୁ ୧୦ କିଲୋମିଟର କାନ୍ଧରେ ମୃତଦେହ ବୋହିଲେ ପରିବାର ଏବଂ ଗ୍ରାମବାସୀ । ସୂଚନା ଅନୁଯାୟୀ, କାଠକୁରା ଗ୍ରାମର ଉପେନ୍ଦ୍ର ନାଗ ଓ ସନ୍ତୋଷ ବାଗଙ୍କର ଗତକାଲି ଦୁର୍ଘଟଣା ଘଟିଥିଲା । ଆଜି ସନ୍ତୋଷ ବାଗଙ୍କର ମୃତ୍ୟୁ ହୋଇଥିଲା । ମୃତଦେହ ବ୍ୟବଚ୍ଛେଦ ପରେ ତାଙ୍କ ପରିବାର ଲୋକଙ୍କୁ ମହାପ୍ରାଣାୟ ଗାଡ଼ି ନମିଳିବାରୁ ତାଙ୍କ ମୃତଦେହକୁ କାନ୍ଧରେ ବୁହା ହେଉଥିବା ଦୃଶ୍ୟ ସାମନାକୁ ଆସିଛି ।
ସୂଚନା ଅନୁଯାୟୀ, ଗତକାଲି କାଠକୁରା ଗାଁର ଉପେନ୍ଦ୍ର ନାଗ ଓ ସନ୍ତୋଷ ବାଗ ଦୁହେଁ କୌଣସି ଏକ କାମ ପାଇଁ ବାହାରକୁ ଯାଇଥିଲେ । ସନ୍ଧ୍ୟା ୬ଟା ବେଳେ ଘରୁ ବାହାରି ଦୁହେଁ ଆଉ ଘରକୁ ଫେରି ନଥିଲେ । ପରେ ପରିବାର ଲୋକ ବହୁ ଖୋଜାଖୋଜି ପରେ ନପାଇବାରୁ ପୋଲିସକୁ ଖବର ଦେଇଥିଲେ । ପୋଲିସ ଗାଁକୁ ଯିବା ପୂର୍ବରୁ କାଠକୁରା ଗାଁ ଜଙ୍ଗଲ ବୁଲାଣିରେ ଦୁଇ ବନ୍ଧୁ ଦୁର୍ଘଟାଣାରେ ଗୁରୁତର ହୋଇ ପଡ଼ି ରହିଥିବା ଦେଖିଥିଲେ । ପରେ ପରିବାର ଲୋକଙ୍କୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପରିବାର ଲୋକେ ପହଞ୍ଚି ଉଭୟଙ୍କୁ ଉଦ୍ଧାର କରି ଥୁଆମୂଲ୍ ରାମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଥିଲେ। ହେଲେ ସେଠାରେ ସନ୍ତୋଷ ବାଗଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ହେବାରୁ ତାଙ୍କୁ ଡ଼ାକ୍ତର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିବା ପାଇଁ କହିଥିଲେ । ହେଲେ ସେଠାରେ ଡାକ୍ତର ଉପେନ୍ଦ୍ର ନାଗଙ୍କୁ ମୃତ ଘୋଷଣା କରିଥିଲେ । ପୋଲିସ ମେଡିକାଲରେ ପହଞ୍ଚି ମୃତଦେହ ଜବତ କରିଥିଲା । ଏନେଇ ଏକ ମାମଲା ରୁଜୁ କରି ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିଲେ।
ଏହା ମଧ୍ୟ ପଢ଼ନ୍ତୁ.. କଳାହାଣ୍ଡିରେ ପୁଣି ଦାନ ମାଝି ! ବାଇକରେ ବୁହା ହେଲା ମୃତଦେହ