ସୁବର୍ଣ୍ଣପୁର: ଜିଲ୍ଲାରେ ଲୋକସଭା ଓ ବିଧାନସଭା ନିର୍ବାଚନ ପାଇଁ ପ୍ରଚାର ଜୋର ଧରିଲାଣି । ଭୋଟରମାନଙ୍କୁ ନିଜ ସପକ୍ଷରେ ଆଣିବାକୁ ବିଭିନ୍ନ ରାଜନୈତିକ ଦଳ ପକ୍ଷରୁ ଭରପୁର ପ୍ରୟାସ ଚାଲିଛି । ଏହାରି ଭିତରେ ଜିଲ୍ଲାର ବୀରମହାରାଜପୁର ବିଧାନସଭା ନିର୍ବାଚନ ମଣ୍ଡଳୀରେ କୃଷି ଓ କୃଷକ ସମସ୍ୟା ନିର୍ବାଚନର ମୁଖ୍ୟ ପ୍ରସଙ୍ଗ ହୋଇଛି । ବିଶେଷ କରି ଭୋଟରମାନେ ଜଳସେଚନ ସମସ୍ୟାର ସମାଧାନ ପାଇଁ ନେତାଏ କ'ଣ କରି ପାରିବେ ତାକୁ ନେଇ ପ୍ରଶ୍ନ କରୁଛନ୍ତି ।
ଚିର ମରୁଡି ପ୍ରପୀଡିତ ବୀରମହାରାଜପୁର ଉପଖଣ୍ଡର ଦୁଇଟି ବ୍ଳକ ଉଲୁଣ୍ଡା ଓ ବୀରମହାରାଜପୁରରେ ଚାଷୀମାନେ ଜଳସେଚନ ସୁବିଧା ଯୋଗାଇ ଦେବା ପାଇଁ ଦାବି କରୁଛନ୍ତି । ବୀରମହାରାଜପୁର ବିଧାନସଭା ନିର୍ବାଚନ ମଣ୍ଡଳୀରେ ବିନିକା ବ୍ଳକର ଅଧିକାଂଶ ଚାଷ ଜମି ହୀରାକୁଦ ଜଳସେଚିତ ଅଞ୍ଚଳରେ ରହିଛି । ଉଲୁଣ୍ଡା ଓ ବୀରମହାରାଜପୁର ଦୁଇଟି ବ୍ଳକର ଆଂଶିକ ଚାଷଜମି ହରିହର ଯୋର ମଧ୍ୟମ ଜଳସେଚନ ପ୍ରକଳ୍ପରୁ ପାଣି ମାଡୁଛି । ତେବେ କେନାଲ ନବୀକରଣ ଓ ଉନ୍ନତି କରଣ ହୋଇ ପାରୁ ନଥିବାରୁ ଆୟକଟ ଏରିଆର ଚାଷୀମାନେ ଆବଶ୍ୟକ ସମୟରେ ଜଳସେଚନ ପାଇଁ ଘୋର ଅସୁବିଧାର ସମ୍ମୁଖୀନ ହେଉଛନ୍ତି ।
ସେହିପରି ଜଳସେଚନ ପ୍ରକଳ୍ପର ବାମ ପାର୍ଶ୍ବ କେନାଲ ତିଆରି ହୋଇ ପାରୁ ନଥିବାରୁ ଆଜକୁ ପ୍ରାୟ 40 ବର୍ଷ ହେଲା ଅପେକ୍ଷା କରି ରହିଥିବା ଚାଷୀମାନେ ବାମ ପାର୍ଶ୍ବ କେନାଲ ତିଆରି କରିବା ପାଇଁ ଦାବି କରିଛନ୍ତି । 80 ଦଶକରେ ନିର୍ମାଣ ହୋଇଥିବା ଏହି ଜଳସେଚନ ପ୍ରକଳ୍ପର ଉଭୟ ପାର୍ଶ୍ବରେ କେନାଲ ନିର୍ମାଣ କରିବା ପାଇଁ ରାଜ୍ୟ ସରକାର ପ୍ରତିଶୃତି ଦେଇଥିଲେ । ହେଲେ ଗୋଟିଏ ପାର୍ଶ୍ବ କେନାଲ ତିଆରି ହୋଇଥିବା ବେଳେ ବାମ ପାର୍ଶ୍ବ କେନାଲ ନିର୍ମାଣ ଆଉ ହୋଇ ପାରିଲାନାହିଁ । ଜଳସେଚନ ପ୍ରକଳ୍ପରେ ଆବଶ୍ୟକ ପାଣି ରହୁ ନ ଥିବାରୁ ବାମ ପାର୍ଶ୍ବ କେନାଲ ନିର୍ମାଣ କରାଯାଉ ନାହିଁ ବୋଲି ଚାଷୀମାନେ ଅଭିଯୋଗ କରିଛନ୍ତି ।