ସମ୍ବଲପୁର:ନକଲି ଓଡ଼ିଆ ସ୍ୱାଭିମାନ ଓ ପାନୀୟ ଜଳ ସମସ୍ୟାକୁ ନେଇ ରାଜ୍ୟ ସରକାରଙ୍କୁ ଘେରିଲା ବିଜେପି । ଆଜି ବିଜେପି ପକ୍ଷରୁ ଭିଏସଏସ ମାର୍ଗ ସ୍ଥିତ ଏକ ହୋଟେଲରେ ସାମ୍ବାଦିକ ସମ୍ମିଳନୀ କରି ଅଭିଯୋଗ ଆଣିଛି ସମ୍ବଲପୁର ଜିଲ୍ଲା ବିଜେପି । ଏନେଇ ବରିଷ୍ଠ ବିଜେପି ନେତା ପ୍ରମୋଦ ରଥ ପ୍ରଶ୍ନ କରିଛନ୍ତି, "ଦୀର୍ଘ ୨୪ ବର୍ଷ ହେଲା ରାଜ୍ୟରେ କ୍ଷମତାରେ ଥିବା ବିଜେଡି ସରକାର ରାଜ୍ୟବାସୀଙ୍କ ପାଇଁ କ'ଣ କରିଛନ୍ତି ? ପୁରୁଣା ମଠ ମନ୍ଦିର ସବୁ ଭାଙ୍ଗି ୪୨ ଶହ କୋଟି ଖର୍ଚ୍ଚ କରି ୪ଟି ଶୌଚାଳୟ ତିଆରି କରିବାକୁ କ'ଣ ଓଡ଼ିଆ ସ୍ୱାଭିମାନ କୁହାଯାଏ କି ? ସମଲେଇ ପ୍ରକଳ୍ପରେ ସ୍ଥାନୀୟ ଲୋକଙ୍କୁ ଅଣଦେଖା କରି ଅଣଓଡ଼ିଆ ଠିକାଦାର ଓ ଶ୍ରମିକଙ୍କୁ ନିୟୋଜିତ କରିବାକୁ ଓଡ଼ିଆ ସ୍ୱାଭିମାନ କୁହାଯାଏ କି ? ଆଳୁ, ପିଆଜ, ମାଛ, ଅଣ୍ଡା ଭଳି ଖାଦ୍ୟ ପଦାର୍ଥ ଉପରେ ବାହାର ରାଜ୍ୟ ଉପରେ ନିର୍ଭର କରିବାକୁ ଓଡି଼ଆ ସ୍ୱାଭିମାନ କୁହାଯାଏ କି ? ଓଡ଼ିଆ ମନ୍ତ୍ରୀ, ସାଂସଦ, ବିଧାୟକ ବାଉଁଶ ପୋତି, ଦରି ବିଛେଇ, ଲୋକ ବୋହି ଅଣଓଡ଼ିଆ ଗୁମାସ୍ତାଙ୍କ ପାଇଁ କାର୍ଯ୍ୟକ୍ରମ ଆୟୋଜନ କରିବାକୁ ଓଡ଼ିଆ ସ୍ୱାଭିମାନ କୁହାଯାଏ କି ?"
ସେ ଆହୁରି କହିଛନ୍ତି, "ହୀରାକୁଦ ନଦୀବନ୍ଧର 3ଟି ମୂଳ ଉଦ୍ଦେଶ୍ୟ ହେଉଛି ଜଳ ସେଚନ, ବନ୍ୟା ନିୟନ୍ତ୍ରଣ ଓ ବିଦ୍ୟୁତ ଉତ୍ପାଦନ । ଏଥିପାଇଁ ସମ୍ବଲପୁର ଜିଲ୍ଲାବାସୀ ବଳିଦାନ ଦେଇଛନ୍ତି । ବିଶେଷ କରି ଦୀର୍ଘ ୨୪ ବର୍ଷ ଧରି ରାଜ୍ୟରେ ଶାସନ ଗାଦିରେ ବସିଥିବା ବିଜେଡି ସରକାର ନା ଜଳସେଚନର ଉନ୍ନତି ପାଇଁ କିଛି କଲେ ନା ବିଶୁଦ୍ଧ ପାନୀୟ ଜଳ ଯୋଗାଣରେ କିଛି କଲେ । ବିଗତ ୧୦ ବର୍ଷରେ କେନ୍ଦ୍ର ସରକାର ୧୦ ହଜାର କୋଟି ଟଙ୍କାରୁ ଅଧିକ ଅନୁଦାନ ଦେଇଛନ୍ତି । ହେଲେ ପ୍ରକୃତରେ ତୃଣମୂଳ ସ୍ତରରେ ତାହା ପହଞ୍ଚୁନି । ରାଜ୍ୟ ରେ ୫୦% ରୁ ଅଧିକ ଘରେ ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଇ ଦେଇ ପାରିନାହାନ୍ତି ରାଜ୍ୟ ସରକାର ।"