ଭୁବନେଶ୍ବର: ମେଣ୍ଟ ପ୍ରସଙ୍ଗକୁ ନେଇ ବୟାନ ବଦଳାଇଲେ ରାଜ୍ୟ ବିଜେପି ସଭାପତି । ମନମୋହଲ ସାମଲ ନିଜ ପ୍ରତିକ୍ରିୟାରେ ପୁଣି ୟୁ-ଟର୍ଣ୍ଣ ନେଇଛନ୍ତି । ଗୋଟିଏ ଦିନରେ ଦୁଇ ଦୁଇ ଥର ଭିନ୍ନ ମତ ଦେଇଛନ୍ତି । ପ୍ରଥମେ ସେ ରାଜ୍ୟରେ ବିଜେପି ଏକାକୀ ଲଢିବ ବୋଲି କହିଥିବାବେଳେ ବର୍ତ୍ତମାନ କହିଛନ୍ତି ଯେ, ନିଷ୍ପତ୍ତିକେନ୍ଦ୍ରୀୟ କମିଟି ନେବ । ସେ କହିଛନ୍ତି ଯେ ରାଷ୍ଟ୍ରୀୟ ସଭାପତି ଏବଂ ସଂସଦୀୟ ବୋର୍ଡ ଯାହା କହିବେ ତାହା ଦଳର ଚୂଡ଼ାନ୍ତ ନିଷ୍ପତ୍ତି । ମେଣ୍ଟ ହେଉ ବା ଅନ୍ୟ ଯାହା ନିଷ୍ପତ୍ତି ହେଉ ସେନେଇ ରାଷ୍ଟ୍ରୀୟ ସଭାପତି ଏବଂ ସଂସଦୀୟ ବୋର୍ଡ ନେବେ । ରାଷ୍ଟ୍ରୀୟ ନେତୃତ୍ବ ଯାହା ନିଷ୍ପତ୍ତି ନେବେ ଆମେ ମାନିବୁ । ଖୁବଶୀଘ୍ର ନିଷ୍ପତି ଆସିବ ବୋଲି କହିଲେ ମନମୋହନ । ସକାଳ ସମୟରେ ଦୁଇ ଦୁଇ ଥର ମିଡିଆରେ କହିଥିବା କଥାକୁ ପୁଣି ବଦଳେଇଲେ ରାଜ୍ୟ ବିଜେପି ସଭାପତି।
ସେ ଆହୁରି ମଧ୍ୟ କହିଛନ୍ତି, "ବିଗତ 8 ଦିନ ଧରି ମିଡ଼ିଆ ବିଭିନ୍ନ ଆକଳନ କରି ଖବର ପ୍ରସାରଣ କଲା । ଏଥିରୁ ନିବୃତ ରହିବା ପାଇଁ ମିଡ଼ିଆକୁ ଅନୁରୋଧ । ଏବେ ନିର୍ବାଚନ ଥିବାରୁ ଏହା ଏକ ସମ୍ବେଦନଶୀଳ ସମୟ । ମୁଁ ଯାହା ଶବ୍ଦ କହୁଛି, ତାକୁ ଚିତ୍ରଣ କରି ନାରେଟିଭ କରିବା ଉଚିତ୍ ନୁହେଁ । ରାଷ୍ଟ୍ରୀୟ ସଭାପତି ଏବଂ ସଂସଦୀୟ ବୋର୍ଡ ଯାହା କହିବେ ତାହା ଦଳର ଚୂଡ଼ାନ୍ତ ନିଷ୍ପତ୍ତି। ରାଷ୍ଟ୍ରୀୟ ନେତୃତ୍ବ ଯାହା ନିଷ୍ପତି ନେବେ ଆମେ ମାନିବୁ । 147 ବିଧାନସଭା ଏବଂ 21 ଲୋକସଭା ସିଟ ପାଇଁ ବିଜେପି କାମ କରୁଛି । ପ୍ରସ୍ତୁତି ଏବଂ ରଣନୀତି ଦଳ କରୁଛି । ଯେଉଁ କଥାକୁ ଖଣ୍ଡନ କରୁଛି, ତାକୁ ଗଣମାଧ୍ୟମ ତିଳକୁ ତାଳ କରୁଛି । ମିଛ ଖବର ଏବଂ ଗୁଜବ ପରିବେଷଣ ହେବା ଉଚିତ୍ ନୁହେଁ । ଭୁଲ ଖବର ଦେଇ ଲୋକଙ୍କୁ ବିଭ୍ରାନ୍ତ କରିବା ଦ୍ୱାରା କାର୍ଯ୍ୟକର୍ତ୍ତାମାନେ ମାନସିକ ଦ୍ବନ୍ଦରେ ଅଛନ୍ତି । 8 ଦିନ ଭିତରେ କୌଣସି ସଂଖ୍ୟା ରାଷ୍ଟ୍ରୀୟ ସଭାପତି କହି ନାହାନ୍ତି । ମେଣ୍ଟ ଶବ୍ଦ ମୁଁ କହିନାହିଁ ।" ସେହିପରି ଆଜି ସନ୍ଧ୍ୟାରେ ପୁଣି ଦିଲ୍ଲୀ ଯିବେ ମନମୋହନ ସାମଲ ଯାହା ଜଣାପଡିଛି। ସେପଟେ ଆଜି ମନମୋହନ ସାମଲ ନିଜର ସୋସିଆଲ ମିଡିଆରେ ପୋଷ୍ଟକୁ ମଧ୍ୟ ଡିଲିଟ କରାଯାଇଛି।