नागपूर :Ramtek Lok Sabha : लोकसभा निवडणुकीच्या पहिल्या टप्प्यातील प्रचार आता अगदी शेवटच्या टप्प्यात येऊन पोहोचला आहे. त्यामुळे भारतीय जनता पक्षाने ही संपूर्ण ताकद पणाला लावली असल्याचं चित्र आहे. दोन दिवसांपूर्वीच चंद्रपूर लोकसभा मतदारसंघात पंतप्रधान नरेंद्र मोदी यांची जाहीर सभा पार पडल्यानंतर आता नरेंद्र मोदी यांची जाहीर सभा नागपूर जिल्ह्यात होऊ घातली आहे. अत्यंत चुरशीची लढत होत असलेल्या रामटेक लोकसभा मतदारसंघाच्या कन्हान येथे ही जाहीर सभा होणार आहे. त्यासाठी भारतीय जनता पक्षाची यंत्रणा कामाला लागली आहे. सभा होणार असलेल्या ठिकाणचा संपूर्ण परिसर हा सुरक्षा यंत्रणांच्या ताब्यात असून, येणाऱ्या-जाणाऱ्यांची कसून तपासणी आणि चौकशी केली जात आहे.
गडकरी, पारवेचा प्रचारार्थ मोदी मैदानात : नागपूर लोकसभा मतदारसंघातील भाजप उमेदवार केंद्रीय मंत्री नितीन गडकरी आणि रामटेक येथील महायुतीचे उमेदवार राजू पारवे यांच्या प्रचारासाठी पंतप्रधान नरेंद्र मोदी यांची सभा होत आहे. रामटेक मतदारसंघात शिवसेनेचे राजू पारवे विरुद्ध श्याम बर्वे अशी थेट लढत होणार आहे. तर, नागपुरात नितीन गडकरी विरुद्ध काँग्रेसचे विकास ठाकरे यांच्यात सरळ लढत होत आहे. यापूर्वी मुख्यमंत्री एकनाथ शिंदे रामटेक येथे शिवसेनेचे उमेदवार राजू पारवे यांच्या प्रचारसभेत सहभागी झाले होते.
मोदी सभेनंतर वातावरण बदलतं : "नरेंद्र मोदीं यांच्या सभेनंतर मतदारसंघात वातावरण बदलत असतं. महाराष्ट्रात एनडीएला अनुकूलता आहे. मात्र, नरेंद्र मोदी यांच्या जाहीर सभेनंतर अनुकूलता आणखी वाढेल, " असं उपमुख्यमंत्री देवेंद्र फडणवीस म्हणाले आहेत.
योगीच्या सभांमधून वातावरण निर्मिती : उत्तरप्रदेशचे मुख्यमंत्री योगी आदित्यनाथ यांना सुद्धा भाजपने प्रचारासाठी विदर्भाच्या मैदानात उतरवलं आहे. पहिल्या टप्प्यात विदर्भातील 5 लोकसभा मतदारसंघात मतदान होणार आहे. या पाचपैकी वर्धा, नागपूर आणि भंडारा या तीन मतदारसंघात योगी आदित्यनाथ यांच्या सभेचा पहिला टप्पा पूर्ण झाला आहे. दुसऱ्या टप्यातदेखील योगी आदित्यनाथच्या सभांचा धडाका सुरू राहणार आहे.
पाऊसामुळे व्यत्यय येण्याची शक्यता : नागपूर, रामटेक, वर्धा यासह पूर्व विदर्भात सोमवारी रात्रभर मुसळधार पाऊस आणि गारपीट झाली आहे. हवामान विभागाच्या माहितीनुसार पुढील दोन ते तीन दिवस विदर्भात अवकाळी पाऊस येण्याची शक्यता आहे. त्यामुळे पंतप्रधान नरेंद्र मोदींच्या रामटेक येथील सभेत पावसाचा व्यत्यय निर्माण होण्याची शक्यता नाकारता येत नाही.