छत्रपती संभाजीनगर Ambadas Danve On Pm Modi : पंतप्रधान नरेंद्र मोदी यांनी आपल्या भाषणात उद्धव ठाकरे यांच्यावर टीका केली. त्यावर विधानपरिषद विरोधीपक्ष नेते अंबादास दानवे यांनी थेट पंतप्रधान नरेंद्र मोदी यांच्यावर निशाणा साधलाय. "आम्ही खोटे आहोत तर तुमच्यासोबत असणारे कोण आहेत," असा प्रश्न अंबादास दानवे यांनी उपस्थित केला. "तुम्ही केलेल्या घोषणांचं काय झालं. मोफत आरोग्य देणार असं म्हणता, मात्र तुमचं कार्ड चालत नाही आणि शिवसेनेवर टीका करतात, असा हल्लबोल त्यांनी केला. तुम्ही आम्हाला नकली म्हणतात, तुम्ही आमचे उंबरठे झिजवत होतात. तुमच्या हाताखाली राहणारी शिवसेना पाहिजे होती. मात्र आम्ही तसं झालो नाही," असं देखील त्यांनी सांगितलं.
सरकारी यंत्रणा भाजपाचे कार्यालय :"भाजपा सरकारी यंत्रणांचा ज्या पद्धतीनं वापर करत आहे, त्यानुसार हे सर्व कार्यालयं भाजपाचे प्रचार कार्यालय असल्यासारखं वाटत आहे. सध्या आचारसंहिता नसती, तर स्वतः आंदोलन करून पाट्या लागल्या असत्या," अशी टीका अंबादास दानवे यांनी केली. "शाहू महाराजांच्या गादीचा अवमान करण्याचं काम महाराष्ट्रात होत आहे. ते सहन होणार नाही. भाजपा विरोधकांना ग्रामपंचायत निवडणूक नाही, असं म्हणतात. मात्र तुम्हीच लक्षात ठेवा, अशी टीका त्यांनी केली. "तुमच्या जाहिरनाम्याचं काय होतं, त्याचं काय झाले, ते बाहेर आणणार," असं अंबादास दानवे यांनी सांगितलं.