ബെംഗളൂരു :ഭൂമിയുടെ ഭ്രമണപഥത്തിന് അപ്പുറം കടന്ന് സൗരഗ്രഹ പര്യവേഷണം നടത്താനുള്ള കഴിവുകൾ ലോക ബഹിരാകാശ സമൂഹം വികസിപ്പിക്കേണ്ടതുണ്ടെന്ന് ഐഎസ്ആർഒ ചെയർമാൻ എസ് സോമനാഥ്. ഇന്ത്യ 42-ാമത് ഇന്‍റര്‍ -ഏജൻസി സ്‌പേസ് ഡെബ്രിസ് കോ-ഓർഡിനേഷൻ കമ്മിറ്റി (ഐഎഡിസി)യുടെ മീറ്റ് രണ്ടാം തവണയും ബെംഗളൂവില്‍ സംഘടിപ്പിക്കുന്നുണ്ടെന്ന് ഇടിവി ഭാരതിനോട് സംസാരിച്ച ഐഎസ്ആർഒ മേധാവി അറിയിച്ചു.
'ഐഎഡിസി ബഹിരാകാശ ഏജൻസികളുടെ ആഗോള സമിതിയാണ്. ബഹിരാകാശ സാമ്പിളുകളുടെ വിവിധ വശങ്ങളും അതിന്‍റെ വെല്ലുവിളികളും ഫോറത്തിൽ ചർച്ചചെയ്യും. ബഹിരാകാശ സുസ്ഥിരതയും പരിക്രമണ മാനേജ്മെന്‍റും ഞങ്ങൾ അഭിമുഖീകരിക്കാൻ ശ്രമിക്കുന്ന പ്രധാന ആശങ്കകളാണ്.' -എസ് സോമനാഥ് പറഞ്ഞു.
ഗഗൻയാൻ ദൗത്യത്തിന്‍റെ ഒരുക്കങ്ങൾ ദ്രുതഗതിയിലാണ് നടക്കുന്നതെന്നും സോമനാഥ് അറിയിച്ചു. എല്ലാം ശരിയായാൽ ഈ വർഷം രണ്ടാം പകുതിയിൽ ബഹിരാകാശത്തേക്കുള്ള മനുഷ്യ ദൗത്യം സംഭവിക്കുമെന്നും ഐഎസ്‌ആര്‍ഒ ചെയര്‍മാന്‍ വ്യക്തമാക്കി.
ചന്ദ്രയാൻ-3 ദൗത്യത്തിന്‍റെ വിജയത്തെയും ഐഎസ്ആർഒ മേധാവി പ്രശംസിച്ചു. 'ചന്ദ്രയാൻ -3 ദൗത്യം പര്യവസാനിച്ചു. ഞങ്ങൾ പരീക്ഷണങ്ങൾ വിജയകരമായി നടത്തുകയും എല്ലാ ശാസ്‌ത്ര വിവരങ്ങളും ശേഖരിക്കുകയും ചെയ്‌തു. സ്ഥിതി വിവരക്കണക്കുകൾ അവലോകനം ചെയ്യുകയാണിപ്പോള്‍. അന്തിമ ഫലവും ഉടൻ തന്നെ പുറത്ത് വരും' -അദ്ദേഹം പറഞ്ഞു.
ഇന്ത്യയുടെ ആദ്യത്തെ സോളാർ ഒബ്‌സർവേറ്ററി മിഷനായ ആദിത്യ എൽ 1 നെ കുറിച്ച് സോമനാഥ് പരാമര്‍ശിച്ചു. 'ആദിത്യ എൽ 1 തുടർച്ചയുള്ള ഒരു ദൗത്യമാണ്, അടുത്ത അഞ്ച് വർഷത്തേക്ക് അത് തുടരും. ഞങ്ങൾ വളരെക്കാലമായി മിഷൻ അപ്‌ഡേറ്റുകൾ സ്ഥിരമായി നിരീക്ഷിച്ച് വരികയാണ്. ബഹിരാകാശ കാലാവസ്ഥയെക്കുറിച്ചും മറ്റ് പല വശങ്ങളെക്കുറിച്ചും അടുത്ത അഞ്ച് വർഷത്തേക്ക് പഠിക്കും' -സോമനാഥ് പറഞ്ഞു.
Also Read :ബഹിരാകാശ മേഖലയിൽ ഭാവിയിൽ എന്തുചെയ്യണമെന്ന് തീരുമാനിക്കാൻ പ്രോഗ്രാമുകളുണ്ട് ; ഐഎസ്ആർഒ ചെയർമാൻ എസ് സോമനാഥ് - ISRO CHAIRMAN S SOMNATH
