ആവേശക്കാഴ്‌ചയായി കുടമാറ്റം
തൃശൂര്‍ : പൂരങ്ങളുടെ പൂരമായ തൃശൂർ പൂരത്തിന്‍റെ ആവേശക്കാഴ്‌ചയായ കുടമാറ്റത്തിന് സാക്ഷിയായി ജന സാഗരം. വ്യത്യസ്‌ത രൂപത്തിലും ഭാവത്തിലും നിറത്തിലുമുള്ള കുടകൾ പൂര പ്രേമികൾക്ക് നയന മനോഹര കാഴ്‌ചയൊരുക്കി. അയോധ്യ രാമക്ഷേത്രം, രാംലല്ല, ഐഎസ്ആർഒ എന്നിവ ഉൾപ്പെടെ കുടമാറ്റത്തിൽ ഇടം പിടിച്ചു.
ഒന്നിനൊന്ന് മെച്ചപ്പെട്ട കുടകളാണ് ഇരു വിഭാഗവും വാനിലുയർത്തിയത്. പല നിറത്തിലും പല രൂപത്തിലുമുളള മികവാര്‍ന്ന കുടകള്‍ നിവര്‍ത്തി മത്സരിച്ചുള്ള കുടമാറ്റം ആസ്വദിക്കാന്‍ പതിനായിരങ്ങളാണ് എത്തിയിരിക്കുന്നത്. സൂര്യാസ്‌തമയത്തോടെ എല്‍ഇഡി കുടകളും പ്രത്യേക കുടകളും രംഗപ്രവേശം ചെയ്‌തു. ആർപ്പു വിളികളോടെയാണ് പൂര പ്രേമികൾ ഇവയെ വരവേറ്റത്.