തിരുവനന്തപുരം : ലോക്സഭ തെരഞ്ഞെടുപ്പിലെ പോളിങ് ശതമാനത്തിലുണ്ടായ കുറവ് ബാധിക്കുക യുഡിഎഫിനെയെന്ന് ആറ്റിങ്ങൽ മണ്ഡലത്തിലെ എൻഡിഎ സ്ഥാനാർഥി വി മുരളീധരൻ. കഴിഞ്ഞ തവണ ശബരിമല വിഷയങ്ങളുടെ പേരിൽ ഉണ്ടായ വർധനവ് അനുകൂലമായി മാറിയത് യുഡിഎഫിനാണ്. ഇത്തവണത്തേത് രാഷ്ട്രീയ വോട്ട് ആയിരിക്കുമെന്നും മുരളീധരൻ മാധ്യമങ്ങളോട് പറഞ്ഞു.
രാഷ്ട്രീയ വോട്ട്, മാറ്റത്തിന് വേണ്ടിയുള്ള വോട്ട് ആകുമ്പോൾ പിണറായി വിജയനോടുള്ള അമർഷം മൂലം പിണറായി വിജയന്റെ ദേശീയ തലത്തിലുള്ള സഖ്യകക്ഷിയായ കോൺഗ്രസിന് വോട്ട് രേഖപ്പെടുത്താൻ ജനങ്ങൾ ഒരിക്കലും മുതിരില്ല. ആ അമർഷം വ്യക്തമാക്കേണ്ടത് എൻഡിഎയ്ക്ക് വോട്ട് ചെയ്തുകൊണ്ടാണെന്ന് ജനങ്ങൾക്ക് വ്യക്തമായ ധാരണയുണ്ട്.