വിശാഖപട്ടണം:അന്താരാഷ്‌ട്ര ടെസ്റ്റ് കരിയറില്‍ ആദ്യ ഇരട്ട സെഞ്ച്വറി പൂര്‍ത്തിയാക്കി യശസ്വി ജയ്‌സ്വാള്‍ (Yashasvi Jaiswal Maiden Double Century In Test Cricket). വിശാഖപട്ടണത്ത് പുരോഗമിക്കുന്ന ഇന്ത്യ ഇംഗ്ലണ്ട് ടെസ്റ്റ് പരമ്പരയിലെ രണ്ടാം മത്സരത്തിന്‍റെ രണ്ടാം ദിനത്തിലാണ് ജയ്‌സ്വാളിന്‍റെ നേട്ടം (India vs England 2nd Test). 277 പന്തില്‍ നിന്നായിരുന്നു ജയ്‌സ്വാള്‍ ഇരട്ട സെഞ്ച്വറി പൂര്‍ത്തിയാക്കിയത്.
179 റണ്‍സുമായി രണ്ടാം ദിവസം ബാറ്റിങ് പുനരാരംഭിച്ച ജയ്‌സ്വാള്‍ കരുതലോടെയാണ് ഇന്ന് ബാറ്റ് വീശി തുടങ്ങിയത്. ജെയിംസ് ആന്‍ഡേഴ്‌സണെയും ഷൊയ്ബ് ബഷീറിനെയും ശ്രദ്ധയോടെ താരം നേരിട്ടു. ഷൊയ്ബ് ബഷീര്‍ എറിഞ്ഞ 100-ാം ഓവറിലെ നാലാം പന്ത് സിക്‌സര്‍ പറത്തിയാണ് താരം ഇന്ന് ആദ്യ ബൗണ്ടറി നേടിയത്.
ജെയിംസ് ആന്‍ഡേഴ്‌സണിന്‍റെ അടുത്ത ഓവറില്‍ ഇന്ത്യയ്‌ക്ക് രവിചന്ദ്രന്‍ അശ്വിനെ (37 പന്തില്‍ 20) നഷ്‌ടപ്പെട്ടു. പിന്നാലെ, ക്രീസിലെത്തിയ കുല്‍ദീപ് യാദവ് ആ ഓവറില്‍ ശേഷിക്കുന്ന പന്തുകളില്‍ റണ്‍സൊന്നും കണ്ടെത്തിയില്ല. അടുത്ത ഓവര്‍ എറിയാനെത്തിയ ഷൊയ്ബ് ബഷീറിനെ ജയ്‌സ്വാള്‍ കടന്നാക്രമിച്ചു.