ന്യൂഡല്‍ഹി : ഐപിഎല്‍ പതിനേഴാം പതിപ്പില്‍ ഓറഞ്ച് ക്യാപ്പിനായുള്ള പോരില്‍ രാജസ്ഥാൻ റോയല്‍സ് നായകൻ സഞ്ജു സാംസണെയും പിന്നിലാക്കി ഡല്‍ഹി ക്യാപിറ്റല്‍സ് ക്യാപ്‌റ്റൻ റിഷഭ് പന്ത്. അരുണ്‍ ജെയ്‌റ്റ്‌ലി സ്റ്റേഡിയത്തില്‍ ഗുജറാത്ത് ടൈറ്റൻസിനെതിരായ മത്സരത്തില്‍ പുറത്താകാതെ 43 പന്തില്‍ 88 റണ്‍സ് പന്ത് അടിച്ചെടുത്തിരുന്നു. ഇതോടെ, ഈ സീസണിലെ റണ്‍വേട്ടക്കാരുടെ പട്ടികയില്‍ മൂന്നാം സ്ഥാനത്തേക്കാണ് റിഷഭ് പന്ത് ഉയര്‍ന്നത്.
സീസണിലെ ഒൻപത് മത്സരങ്ങളില്‍ നിന്നായി 48.86 ശരാശരിയില്‍ 342 റണ്‍സാണ് റിഷഭ് പന്ത് നേടിയത്. 161.32 സ്ട്രൈക്ക് റേറ്റിലാണ് സീസണില്‍ പന്തിന്‍റെ ബാറ്റിങ്. 21 സിക്‌സറും 27 ഫോറും അടിച്ചെടുക്കാനും പന്തിന് സാധിച്ചിട്ടുണ്ട്.
റോയല്‍ ചലഞ്ചേഴ്‌സ് ബെംഗളൂരുവിന്‍റെ സ്റ്റാര്‍ ബാറ്റര്‍ വിരാട് കോലിയാണ് പട്ടികയില്‍ ഒന്നാമൻ. എട്ട് കളികളില്‍ നിന്നും 63.17 ശരാശരിയില്‍ 379 റണ്‍സാണ് വിരാട് കോലിയുടെ സമ്പാദ്യം. 150.39 സ്ട്രൈക്ക് റേറ്റില്‍ ബാറ്റ് വീശുന്ന കോലി ഒരു സെഞ്ച്വറിയും രണ്ട് ഫിഫ്‌റ്റിയും നേടിയിട്ടുണ്ട്.
ലിസ്റ്റില്‍ മൂന്നാം സ്ഥാനത്ത് ചെന്നൈ സൂപ്പര്‍ കിങ്‌സ് നായകൻ റിതുരാജ് ഗെയ്‌ക്‌വാദാണ്. എട്ട് കളികളില്‍ 349 റൺസ് ആണ് ഗെയ്‌ക്‌വാദിന്‍റെ സമ്പാദ്യം. ലഖ്‌നൗ സൂപ്പര്‍ ജയന്‍റ്‌സിനെതിരായ അവസാന മത്സരത്തില്‍ സെഞ്ച്വറി അടിച്ചതോടെയാണ് ചെന്നൈ നായകൻ പട്ടികയില്‍ രണ്ടാം സ്ഥാനത്തേക്ക് എത്തിയത്.