वाशिम -अल्पवयीन मुलीला ४० हजार रूपयात राजस्थानमध्ये विकणाऱ्या टोळीला वाशीम पोलिसांनी जेरबंद केले आहे. त्यामुळे मोठ्या प्रकरणाचा खुलासा करण्यात वाशीम शहर पोलिसांना यश आले आहे. वाशीम येथील वाल्मीक नगर येथे राहणाऱ्या श्रीमती कल्पना अशोक पवार यांच्या तक्रारीवरून त्यांची मोठी बहीण अरूणा पवार यांच्या मुलीला (वय ११ वर्ष ८ महिने) घनश्याम पवार (रा.हतगाव) व जयेंद्र पवार (रा. बोरी ता. दारवा जिल्हा यवतमाळ) यांनी बाहेर फिरविण्यासाठी नेले होते. व नंतर अकोला येथून मुंबईला नेवून राजस्थानमध्ये विकले होते.
२६ एप्रिल पर्यंत पोलिस कोठडी
वाशीम पोलिसांनी पथक पाठवून दोन्ही आरोपींना गुजरातच्या बारडोली पोलीस स्टेशनच्या जिल्हा सुरत येथून अल्पवयीन मुलीसह ताब्यात घेतले. अटक केल्यानंतर पोलीस कस्टडीत अनेक गोष्टीचा उलगडा झाला. आरोपींनी तिला ४० हजार रूपयात विकल्याचे कबुल केले आहे. आरोपीच्या सांगण्यावरून राजस्थान येथून मदन बांगडवा, राकेश बांगडवा, संदीप बांगडवा यांना ताब्यात घेतले आहे. त्यांच्या विरूध्द मुलीच्या जबाबावरून विविध गुन्हे दाखल करण्यात आले आहेत. त्यांना न्यायालयात हजर केले असता २६ एप्रिलपर्यंत पोलीस कोठडी मंजुर करण्यात आली आहे.