रत्नागिरी whale calf death in Ratnagiri :गणपतीपुळे समुद्रकिनारी आढळून आलेल्या व्हेल माशाच्या पिल्लाचा अखेर मृत्यू झालाय. गेल्या 42 तासांपासून ग्रामस्थांसह प्रशासनाकडून या माशाचा जीव वाचवण्याचे आटोकाट प्रयत्न सुरू होते. मात्र, त्यांच्या प्रयत्नांना अखेर अपयश आलंय. बुधवारी रात्री या व्हेल माशाच्या पिल्लाचा अखेर मृत्यू झालाय. सायंकाळी भरतीची वेळ नसल्यानं या माशाला जिवंत ठेवण्यासाठी त्याला पाणी उपलब्ध करून देणं गरजेचं असल्यानं एमटीडीसी कर्मचारी तसंच ग्रामपंचायतीचे जीवरक्षक यांनी समुद्राच्या पाण्याचा मारा करून त्याला जिवंत ठेवलं होतं.
माशाचा जिव वाचवण्यासाठी वनविभागाकडून आटोकाट प्रयत्न : दोन दिवसांपूर्वी गणपतीपुळे येथील समुद्रकिनाऱ्याजवळ ग्रामस्थांना व्हेल माशाचं पिल्लू बेशुद्ध अवस्थेत आढळून आलं होतं. या पिल्लाची प्रकृती खालावलेली होती. ग्रामस्थांनी लगेच या घटनेची माहिती वनविभागाला दिली. यानंतर वनविभागाकडून या व्हेल माशाला जिवंत ठेवण्यासाठी खुप प्रयत्न सुरू होते. कापड्यामध्ये गुंडाळून त्याच्यावर दिवसभर पाण्याचा मारा केला जात होता. भरती सुरू झाल्यानंतर मंगळवारी सायंकाळी उशिरापर्यंत या माशाला जेसीबीच्या सहाय्यानं समुद्रात सोडण्यात आलं होतं.