दौंड (पुणे):राज्यात सध्या बारावीच्या परीक्षा सुरू आहेत. यासाठी शासनाकडून मुक्त अभियान राबिवले जात आहे. दरम्यान, शिक्षकांनी विद्यार्थ्यांना कॉपी करण्यास मदत केल्याचा प्रकार समोर आला आहे. विद्यार्थ्यांची अंग झडती न घेता त्यांना सामूहिक कॉपी करण्यासाठी अप्रत्यक्षरीत्या सहाय्य केले आहे. दौंड तालुक्यातील केडगाव येथील जवाहरलाल विद्यालयात हा धक्कादायक प्रकार उघडकीस आला आहे. 12 वी ची परीक्षा सुरू असताना भरारी पथकाने ही कारवाई केली आहे. याप्रकरणी यवत पोलीस स्टेशन येथे 9 शिक्षकांवर गुन्हा दाखल झाल्याची माहिती यवत पोलीस स्टेशन चे पोलीस निरीक्षक हेमंत शेडगे यांनी दिली आहे.
कॉपी करण्यास केली मदत: बारावीच्या परीक्षेसाठी शिक्षकांनी परिक्षा ही काॅपीमुक्त न करता विद्यार्थ्यांना मास काॅपी करण्यासाठी प्रतिबंध न करता त्यांची अंगझडती न घेता त्यांना काॅपी करणेसाठी उत्तेजन देवुन अप्रत्यक्ष रित्या सहाय्य केले आहे. दौंड तालुक्यातील केडगाव येथील जवाहरलाल विद्यालयातील प्रकार घडला आहे. विद्यार्थ्यांना कॉपी करण्यास प्रतिबंध न करता त्यांना अप्रत्यक्षरीत्या सहाय्य केल्याप्रकरणी परीक्षा केंद्र संचालकासह नऊ जणांवर गुन्हा दाखल करण्यात आला आहे. शिक्षण विभागाचे विस्तार अधिकारी किसन भुजबळ यांनी दिलेल्या फिर्यादीवरून हा गुन्हा यवत पोलीस स्टेशन येथे दाखल करण्यात आला आहे.