परभणी - वैद्यकीय प्रवेशासाठीचे 70:30 चे सूत्र रद्द करावे, यासाठी परभणीतून सुरू झालेल्या आंदोलनाला मराठवाड्याचे भूमिपुत्र तथा वैद्यकीय शिक्षणमंत्री अमित देशमुख यांच्या माध्यमातून यश आले आहे. यानंतर आता जिल्ह्यातील शासकीय वैद्यकीय महाविद्यालयाच्या मंजुरीसाठी उभारलेला लढा आणखी तीव्र करण्यात येईल, असे परभणीचे खासदार संजय जाधव यांनी सांगितले. यासाठी जिल्ह्यातील सर्वपक्षीय शिष्टमंडळ घेऊन मुख्यमंत्री उद्धव ठाकरे यांची भेट घेणार असल्याची त्यांनी पत्रकार परिषदेत माहिती दिली.
मराठवाडा आणि विदर्भातील विद्यार्थ्यांवर अन्याय करणारा वैद्यकीय महाविद्यालयांच्या प्रवेशाचा 70:30 चा फार्म्युला रद्द करण्यासाठी खासदार संजय जाधव यांच्या नेतृत्वाखाली परभणीतून आंदोलन उभारण्यात आले होते. या संदर्भात आज वैद्यकीय मंत्री अमित देशमुख यांनी सभागृहात घोषणा केल्याच्या पार्श्वभूमीवर खासदार संजय जाधव यांनी परभणीत पत्रकार परिषद घेऊन राज्याचे वैद्यकीय शिक्षणमंत्री अमित देशमुख तसेच सरकारचे अभिनंदन केले. यावेळी पुढे बोलताना खासदार संजय जाधव म्हणाले, 'हे सूत्र रद्द झाल्याने मराठवाड्यातील विद्यार्थ्यांवर आता खऱ्या अर्थाने अन्याय दूर झाला आहे. हा विषय मराठवाड्याचा होता, पण आता परभणीच्या वैद्यकीय महाविद्यालयाचा प्रश्न अजूनही बाकी आहे. यासाठी सर्व पक्ष नेत्यांना घेऊन आपण मुख्यमंत्री उद्धव ठाकरे यांची भेट घेणार आहोत. परभणीचे वैद्यकीय महाविद्यालय कार्यान्वित करावे, अशी मागणी लावून धरणार आहोत.