आशेरी गडावर पर्यटकांची गर्दी; कोरोना नियमांची पायमल्ली

पालघर जिल्ह्यात आशेरी गडावर मोठ्या प्रमाणात पर्यटकांनी गर्दी केली आहे. या पर्यटकांकडून कोरोना नियमांना केराची टोपली दाखवविण्यात आल्याचे चित्र दिसत आहे.

पालघर- पावसाळा सुरू होताच पर्यटकांना गड-किल्ल्यांवर पर्यटनासाठी जाण्याची ओढ लागते. त्यातच कोरोना निर्बंधामुळे नागरिक अनेक दिवस घरातच होते. त्यामुळे निर्बंध शिथिल होताच पर्यटकांची पावलेही पर्यटनस्थळांकडे वळू लागली आहेत. पालघर जिल्ह्यातील वाडा-खडकोना या गावातील आशेरी गडावर पर्यटकांनी मोठी गर्दी केल्याचे पहायला मिळात आहे. त्यामुळे कोरोनाचे नियम धाब्यावर बसवल्याचे चित्र समोर आहे.

कोरोना नियम पायदळी

पालघर जिल्ह्यात आशेरी गडावर आलेल्या पर्यटकांकडून कोरोना नियमांना केराची टोपली दाखवविण्यात आल्याचे समोर आले आहे. पर्यटकांनी तुफान गर्दी करत प्रशासनाने ठरवून दिलेले नियम पायदळी तुडविले आहे. रविवारची सुट्टी असल्याने हजारोच्या संख्येने पालघरसह, मुंबई, ठाणे, गुजरात या बड्या शहरातील हजारो पर्यटक गडावर दाखल झाले आहेत.

कोरोना संसर्ग वाढण्याची भीती

जिल्ह्यात कोरोनाबाधित रुग्णांची संख्या पुन्हा वाढत असताना पर्यटकांचा निष्काळजीपणा समोर आला आहे. मात्र या वाढत्या गर्दीमुळे पुन्हा कोरोना संसर्गाचा प्रादुर्भाव वाढण्याची भीती व्यक्त करण्यात येत आहे. कोरोनाचे संकट हळूहळू कमी होऊ लागल्याने पर्यटकांचा ओढा पर्यटनस्थळी वाढू लागला होता. रविवारी पर्यटन स्थळाच्या ठिकाणी मोठी गर्दी जमली होती. यामुळे करोना संसर्गाचा प्रादुर्भाव व इतर दुर्घटना घडण्याची भीती नागरिकांमधून व्यक्त करण्यात येत आहे.

हेही वाचा -नाशिक; पोलिसांना चकवा देत पर्यटन स्थळी गर्दी; त्र्यंबकेश्वर तालुक्यात 44 पर्यटकांवर कारवाई