मुंबई- शहरात आज (सोमवार) दोन ठिकाणी आग लागल्याची घटना घडली आहे. पहिल्या घटनेत मीरा रोड परिसरात गॅस सिलेंडरने भरलेल्या दोन ट्रकला आग लागली तर दुसऱ्या घटनेत अंधेरीतील MIDC कंपनीत आग लागल्याची घटना घडली आहे. या घटनांमध्ये दोन जण जखमी झाल्याची माहिती मिळत आहे.
गॅस सिलेंडरच्या ट्रकला आग
मीरा रोड येथील प्रेमनगर परिसरातील एका मैदानात एचपी गॅस सिलेंडरने भरलेल्या दोन ट्रकला मध्यरात्री दोनच्या सुमारास अचानक आग लागली. या भीषण आगीमुळे एक-एक करुन जवळपास सात सिलेंडरचा स्फोट झाला. घटनास्थळी मीरा-भाईंदर मनपा अग्निशमन दलाच्या सात गाड्या दाखल झाल्या असून आगीवर नियंत्रण मिळवण्यात यश आले आहे. तर अंधेरी येथील MIDC कंपनीत भीषण आग लागल्याची घटना घडली आहे.