मुंबई :पावसाळी अधिवेशनाचा तिसरा दिवस आहे. राज्याचे माजी मुख्यमंत्री उद्धव ठाकरे यांनी अधिवेशनाला हजेरी लावली. यावेळी त्यांनी राज्याचे उपमुख्यमंत्री अजित पवार यांची देखील भेट घेतली. बंगळुरू येथे काल एक लोकशाही आणि देशमप्रेमी लोकांची बैठक झाली. ती बैठक कुणाच्या विरोधात नव्हती, तर हुकुमशहीच्या विरोधात बैठक होती, अशी प्रतिक्रिया माजी मुख्यमंत्री उद्धव ठाकरे यांनी दिली आहे.
देशप्रेमी एकत्र आले :बंगळुरू येथे देशातील भाजप विरोधातील सर्वंच लहान मोठ्या पक्षांची दोन दिवशीय बैठक संपन्न झाली. या बैठकीला देशातील 26 पक्षांनी सहभाग नोंदवला. या बैठकीला राज्यातून ठाकरे गटाचे पक्ष प्रमुख, माजी मुख्यमंत्री उद्धव ठाकरे यांनी हजेरी लावली होती. बैठकी विषयी बोलतांना उद्धव ठाकरे म्हणाले कि, बैठकीतील माहिती मीडियाच्या माध्यमातून सर्वांपर्यंत पोहचली आहे. काल, परवा दोन दिवस बंगळुरूमध्ये देशप्रेमी पक्षांची एक बैठक झाली. देशप्रेमी, लोकशाहीप्रेमी पक्षांची आघाडी स्थापना झाली आहे. आमची लढाई एखाद्या व्यक्तीविरोधात नाही, कोणत्या पक्षा विरोधात नाही, तर हुकूमशाही विरोधात आहे. पंतप्रधान, मुख्यमंत्री सातत्याने येणारी जाणारी लोक असतात, पण लोकशाही टिकली पाहिजे. जो पायंडा पडत चालला आहे, तो देशासाठी घातक आहे. हुकूमशाहीच्या विरोधात मजबूत आघाडी निर्माण झाली आहे, असे ठाकरे म्हणाले.