गडचिरोली -गेले सहा ते सात दिवस भामरागड गावासह तालुक्यातील अनेक गावे पुराच्या पाण्याखाली होती. यावर्षीच्या पावसाळ्यात तब्बल सात वेळा भामरागडचा संपर्क तुटला होता.आता प्रशासनाकडून पूरग्रस्तांचे पंचनामे सुरू आहेत. मात्र अनेक गावांमध्ये जाण्यासाठी रस्तेच नसल्याने तलाठी, ग्रामसेवक, डॉक्टर जीव धोक्यात घालून नाला पार करत असल्याचा व्हिडिओ समोर आला आहे.
भामरागड तालुक्यातील इरपणार या गावाला जात असताना नाल्यातून वाट काढावी लागत आहे. या नाल्यातील पाण्याला प्रवाह आहे. मात्र तलाठी आणि ग्रामसेवक, आपला जीव धोक्यात घालून नाला पार करत आहेत. तलाठी यांना पोहता येत नसल्याने दोन स्थानिक लोकांच्या साहाय्याने त्यांना उचलून नाला पार करवला जात आहे. विविध सामाजिक संघटनांकडून पूरग्रस्तांना जिवनावश्यक वस्तूंचे वाटप केले जात आहे. मात्र हे साहित्य पोहोचवण्यासाठी देखील तारेवरची कसरत करावी लागत आहे.