मुंबई- Tiger 3 box office collection day 4: सलमान खान आणि कतरिना कैफ यांच्या दिवाळीत रिलीज झालेल्या 'टायगर 3' चित्रपटानं बॉक्स ऑफिसवर जबरदस्त ओपनिंग करत गर्जना केली. पहिल्या आणि दुसऱ्या दिवशी उत्तम कमाई केल्यानंतर तुलनेनं तिसऱ्या आणि चौथ्या दिवशीच्या कमाईत घट जाणवली. असं असलं तरी भारतात अवघ्या चार दिवसांत 'टायगर 3' नं एकूण १६९ कोटी रुपयांची कमाई केलीय. हा चित्रपट आता 200 कोटींचा आकडा पार करण्याच्या मार्गावर पुढे सरकतोय.
'टायगर 3' हा यशराज फिल्म्सच्या स्पाय फ्रँचायझीमधला पाचवा भाग आहे. याच्या रिलीजची मोठी प्रतीक्षा चाहत्यांना करावी लागली होती. रिलीजनंतर अपेक्षित प्रतिसादही मिळालाय. भारतात रिलीजच्या पहिल्या दिवशी चित्रपटानं सर्व भाषांमध्ये 44.50 कोटी रुपयांची कमाई केली होती. मात्र ट्रेड रिपोर्ट्सनुसार बुधवारी भाऊबीजेचा सण देशभर वेगवेगळ्या पद्धतीनं साजरा होत असल्यामुळे चित्रपटाच्या कमाईत 25 टक्क्यांची घसरण पाहायला मिळाली. या दिवशी चित्रपटाच्या एकूण कलेक्शनमध्ये केवळ 22 कोटी रुपयांची भर पडली. आत्तापर्यंत, 'टायगर 3' ने भारतात एकूण 169.50 कोटी रुपयाचा गल्ला जमा केलाय. चित्रपटानं चौथ्या दिवशी सरासरी 18.78 टक्के व्याप्ति राखल्याचं सांगण्यात येतंय..
'टायगर 3' हा चित्रपट 'एक था टायगर', 'टायगर जिंदा है' या पहिल्या दोन टायगर फ्रँचाइजीचा पुढील भाग आहे. यशराजच्या 'टायगर', 'वॉर' आणि 'पठाण' या स्पाय युनिव्हर्सचा हा एक भाग आहे. या चित्रपटात सलमान खान आणि कतरिना कैफ यांनी अविनाश आणि झोया या त्यांच्या भूमिका पुन्हा साकारल्या आहेत. मनीश शर्मा दिग्दर्शित आणि आदित्य चोप्रा निर्मित 'टायगर 3' हा टायगर फ्रँचायझीमधील तिसऱ्या भागात शाहरुख खान आणि हृतिक रोशन यांची कॅमिओ एन्ट्री होती.