मुंबई- तेजस्विनी पंडित ही एक उत्तम अभिनेत्री असून तिने वैविध्यपूर्ण भूमिकांतून प्रेक्षकांचे मनोरंजन केले आहे. आता ती एका नवीन रूपात प्रेक्षकांसमोर येतेय. तेजस्विनीने नुकतेच ‘बांबू’ या चित्रपटाद्वारे निर्मितीक्षेत्रात पाऊल टाकले आहे. यात प्रेमात पडलेल्या किंबहुना ‘लागलेल्या’ ‘बांबू’ ची कथा खुमासदार पद्धतीने मांडण्यात आली आहे. तेजस्विनी पंडित आणि संतोष खेर निर्मित आणि विशाल देवरुखकर दिग्दर्शित नव्या चित्रपटाची घोषणा झाली असून ‘बांबू’ मधून एक आगळावेगळा विषय हाताळला जाणार आहे, मनोरंजक पद्धतीने.
मराठी सिनेसृष्टीत 'बॉईज', 'बॉईज २' आणि 'गर्ल्स' ची दंगामस्ती पडद्यावर सादर केल्यानंतर आता दिग्दर्शक विशाल सखाराम देवरुखकर आणखी एक तुफान चित्रपट घेऊन सज्ज झाले आहेत. 'बांबू' असे या चित्रपटाचे नाव असून प्रेमात पडलेल्या, नव्हे लागलेल्या प्रत्येकासाठी हा सिनेमा आहे. नुकताच या चित्रपटाचा मुहूर्त सोहळा पार पडला असून यानिमित्ताने ‘बांबू’चे टिझर प्रेक्षकांच्या भेटीला आले आहे. अंबर विनोद हडप लिखित या चित्रपटाची पहिलीच झलक खूप काही सांगून जाणारी आहे. 'लव्ह अंडर कन्स्ट्रक्शन' म्हणजेच यात प्रेमकहाणी पाहायला मिळणार असून त्यात 'बांबू'ही पडणार आहेत. आता हे 'बांबू' कोणाला आणि कसे पडणार आहेत, हे पाहणे रंजक ठरेल.
सध्या तरी ‘बांबू’ चित्रपटातील कलाकारांची नावे गुलदस्त्यात ठेवण्यात आली आहेत. लवकरच त्यांचीही आोळख होईल. विशेष बाब म्हणजे अभिनेत्री तेजस्विनी पंडित ‘बांबू’च्या निमित्ताने चित्रपट निर्मिती क्षेत्रात पदार्पण करत आहे. यापूर्वी तिने प्लॅनेट मराठीसाठी ‘अथांग’ या वेबशोची निर्मिती केली आहे जी लवकरच प्रेक्षकांच्या भेटीला येईल आणि नुकतेच तिने प्रस्तुतकर्ता म्हणूनही काम केले आहे.