मुंबई- अभिनेत्री रवीना टंडनचा एक व्हिडिओ सध्या सोशल मीडियावर खूप चर्चेत आहे. सातपुड्याच्या जंगलात भटकत असताना रवीनाने वाघाचा व्हिडिओ आपल्या कॅमेऱ्यात कैद केला आहे. या व्हिडिओवर वन विभागाने आक्षेप घेत तिची चौकशी सुरू केली आहे. त्यामुळे तिची अडचण वाढू शकते.
अभिनेत्री रवीना टंडनने बुधवारी सांगितले की ती वनविभागाच्या परवाना असलेल्या जीपमध्ये ती प्रवास करत होती. जंगलातील पर्यटन मार्गावरुनच ती जात असताना तिला वाघाचे दर्शन घडले. मात्र सातपुडा व्याघ्र प्रकल्पाच्या अधिकार्‍यांनी तिच्या या व्हिडिओची चौकशी सुरू केली ज्यामध्ये ती कथितपणे संरक्षित क्षेत्रात वाघिणीच्या जवळून वाहन चालवताना दिसत आहे.
22 नोव्हेंबर रोजी रिझर्व्हला भेट देणाऱ्या टंडनने एका ट्विटमध्ये म्हटले आहे की, विभागाद्वारे प्रदान केलेले प्रशिक्षित मार्गदर्शक आणि ड्रायव्हर तिच्यासोबत सफारीवर होते. स्थानिक वृत्तवाहिनीचा 25 नोव्हेंबरचा व्हिडिओ अहवाल शेअर करताना, अभिनेत्री ट्विटरवर म्हणाली, "वाघ कधी आणि कशी प्रतिक्रिया देतील हे कोणीही सांगू शकत नाही. हे वन विभागाचे परवानाधारक वाहन आहे, त्यांचे कायदेशीर मार्गदर्शक आणि ड्रायव्हर ज्यांना त्यांच्या सीमा जाणून घेण्याचे प्रशिक्षण दिले जाते."
रवीना टंडनच्या म्हणण्यानुसार, ती आणि सहप्रवासी शांत बसले आणि त्यांनी वाघिणीची हालचाल पाहिली. ती म्हणाली, "आम्ही पर्यटनाच्या मार्गावर होतो, हा मार्ग बहुतेकदा हे वाघ ओलांडतात. आणि या व्हिडीओतील कॅटी वाघिणीलाही वाहनांच्या जवळ येऊन धडकण्याची सवय आहे," असे ती म्हणाली. ''वाघ जिथे फिरतात ते तिथले राजे आहेत, तिने दुसर्‍या ट्विटमध्ये लिहिले आणि ते "मूक प्रेक्षक" आहेत. 48 वर्षीय अभिनेत्रीने पुढे सांगितले की, "कोणत्याही अचानक हालचाली त्यांना चकित करू शकतात."