नवी दिल्ली- बॉलिवूड अभिनेत्री जॅकलिन फर्नांडिसला २०० कोटी रुपयांच्या खंडणी प्रकरणात थोडासा दिलासा मिळाला आहे. आज जॅकलिनला दिल्लीच्या पटियाला हाऊस न्यायालयाने ५० हजार रुपयांच्या जातमुचलक्यावर अंतरिम जामीन मंजूर केला आहे. कथित आरोपी सुकेश चंद्रशेखरशी संबंधित २०० कोटी रुपयांच्या खंडणी प्रकरणात जॅकलिनला आरोपी म्हणून न्यायालयात हजर करण्यात आले होते. सक्तवसुली संचालनालयाने प्रिव्हेन्शन ऑफ मनी लाँडरिंग कायद्यानुसार सुकेश चंद्रशेखरवर गुन्हा दाखल केला आहे. याप्रकरणी ईडीने जॅकलिन फर्नांडिसला आरोपी करत अलीकडेच न्यायालयात पुरवणी आरोपपत्र दाखल करण्यात आले आहे.
न्यायालयाने जॅकलिनला २६ सप्टेंबर रोजी हजर राहण्यास सांगितले होते. २०० कोटी रुपयांच्या खंडणी प्रकरणात चौकशी करण्यासाठी दिल्ली पोलिसांनी जॅकलिनला दोनदा चौकशीसाठी बोलावले आहे. मनी लॉंड्रिंगप्रकरणातील आरोपी सुकेश चंद्रशेखरकडून जॅकलिनने कोट्यवधींच्या भेटवस्तू स्वीकारल्याचा आरोप तिच्यावर आहे. आरोपी सुकेश सध्या तिहार तुरुंगात आहे.