अहमदाबाद - किडनी स्टोनमुळे त्रस्त असलेल्या रुग्णांची शस्त्रक्रियेदरम्यान डॉक्टरांनी किडनीच काढून घेतल्याची धक्कादायक घटना गुजरातमध्ये घडली आहे. यामुळे रुग्णाला आपला जीव गमवावा लागला. या प्रकरणावर कडक कारवाई करत गुजरात राज्य ग्राहक विवाद निवारण आयोगाने हॉस्पिटलला 11 लाखांहून अधिक दंड ठोठावला आहे. ही रक्कम मृताच्या वारसांना दिली जाईल.
गुजरातमधील एका रुग्णालयात डॉक्टरने मूतखड्याची शस्त्रक्रिया करताना मूतखड्याऐवजी किडनी काढली. त्यामुळे रुग्णाचा चार महिन्यानंतर मृत्यू झाला. आता गुजरातच्या ग्राहक विवाद निवारण आयोगाने मृत रुग्णाच्या कुटुंबीयांना 1.23 लाख रुपये नुकसान भरपाई देण्याचे आदेश संबंधित रुग्णालयाला दिले आहेत.
गुजरातमधील खेडा जिल्ह्यात असलेल्या वांघरोळी गावातील रहिवाशी देवेंद्रभाई रावल यांना पाठदुखीचा आणि लघवी करताना त्रास होत होता. मे 2011 मध्ये त्यांना हा त्रास सुरू झाला होता. त्यामुळे त्यांनी रुग्णालयात जाण्याचा निर्णय घेतला. रावल यांनी केएमजी जनरल हॉस्पिटलमधील डॉक्टर शिवूभाई पटेल यांच्याशी संपर्क साधला. तेव्हा मे 2011 मध्ये, त्याच्या डाव्या मूत्रपिंडात 15 मिमी स्टोन असल्याचे उघड झाले. रावल यांना चांगल्या उपचारासाठी चांगल्या ठिकाणी जाण्याचा सल्ला देण्यात आला होता. परंतु त्यांनी त्याच रुग्णालयात शस्त्रक्रिया करणे योग्य मानले.
3 सप्टेंबर 2011 रोजी त्याच्यावर शस्त्रक्रिया करण्यात आली. या शस्त्रक्रियेनंतर डॉक्टरांनी सांगितले की दगडांऐवजी त्याची किडनी काढावी लागेल. हे ऐकून कुटुंब थोडे आश्चर्यचकित झाले. मात्र, हे रुग्णाच्या हितासाठी करण्यात आल्याचे डॉक्टरांनी सांगितले. यानंतरही रावल यांना लघवी करताना जास्त त्रास होऊ लागला. तेव्हा त्याला नडियाडच्या किडनी रुग्णालयात दाखल करण्यात आले. नंतर त्यांची प्रकृती आणखी खालावली. तेथून त्यांना अहमदाबादच्या आयकेडीआरसीमध्ये नेण्यात आले. मात्र, 8 जानेवारी 2012 रोजी त्यांचे निधन झाले. यानंतर रावल यांचे कुटुंबीयांनी ग्राहक तक्रार निवारण आयोगाकडे धावा घेतली. 2012 मध्ये आयोगाने हॉस्पिटल आणि युनायटेड इंडिया इन्शुरन्स कंपनी लिमिटेडला 11.23 लाख रुपयांची भरपाई देण्याचे आदेश दिले. रुग्णालयातील कर्मचाऱ्यांच्या दुर्लक्षामुळे मृत्यू झाल्याचं आयोगाने नमूद केलं.
हेही वाचा -केंद्रीय आरोग्य राज्यमंत्री भारती पवारांची सीरम इन्स्टिट्यूटला भेट