ലണ്ടന്‍:ലോക ടെസ്റ്റ് ചാമ്പ്യന്‍ഷിപ്പ് ഫൈനലിനായുള്ള കാത്തിരിപ്പിലാണ് ക്രിക്കറ്റ് ആരാധകര്‍. ജൂണ്‍ ഏഴിന് ലണ്ടനിലെ ഓവല്‍ ക്രിക്കറ്റ് സ്റ്റേഡിയത്തിലാണ് ഇന്ത്യയും ഓസ്‌ട്രേലിയയും തമ്മിലുള്ള കലാശപ്പോരാട്ടം നടക്കുന്നത്. ഇംഗ്ലണ്ടിലുള്ള ഇരു ടീമും ടെസ്റ്റ് ചാമ്പ്യന്‍ഷിപ്പ് ഫൈനല്‍ പോരാട്ടത്തിനുള്ള മുന്നൊരുക്കങ്ങള്‍ തകൃതിയായി തന്നെ നടത്തുന്നുണ്ട്.
ഐപിഎല്‍ മത്സരങ്ങള്‍ പൂര്‍ത്തിയായ മുറയ്‌ക്ക് പല സംഘങ്ങളായിട്ടായിരുന്നു ഇന്ത്യന്‍ ടീം ഇംഗ്ലണ്ടിലേക്കെത്തിയത്. പരിശീലകന്‍ രാഹുല്‍ ദ്രാവിഡ്, സ്റ്റാര്‍ ബാറ്റര്‍ വിരാട് കോലി എന്നിവരുള്‍പ്പെട്ട സംഘമായിരുന്നു ആദ്യം ഇംഗ്ലണ്ടിലെത്തിയത്. പിന്നാലെയാണ് നായകന്‍ രോഹിത് ശര്‍മ, ഓപ്പണര്‍ ശുഭ്‌മാന്‍ ഗില്‍ ഉള്‍പ്പടെയുള്ളവര്‍ ടീമിനൊപ്പം ചേര്‍ന്നത്.
ഇതിനിടെ, ഇന്നലെ നടന്ന എഫ്എ കപ്പ് ഫൈനല്‍ പോരാട്ടം കാണാന്‍ വിരാട് കോലി ഭാര്യ അനുഷ്‌ക ശര്‍മയ്‌ക്കൊപ്പം എത്തിയിരുന്നു. ഇവര്‍ക്കൊപ്പം ഇന്ത്യയുടെ യുവ ഓപ്പണിങ് ബാറ്റര്‍ ശുഭ്‌മാന്‍ ഗില്ലും ഉണ്ടായിരുന്നു. പ്രത്യേക ക്ഷണം ലഭിച്ചതിനെ തുടര്‍ന്നായിരുന്നു ഇവര്‍ എഫ്എ കപ്പ് ഫൈനല്‍ മത്സരം കാണാനെത്തിയത്.
മാഞ്ചസ്റ്റര്‍ സിറ്റിയും മാഞ്ചസ്റ്റര്‍ യുണൈറ്റഡും തമ്മിലായിരുന്നു ഇക്കുറി എഫ്എ കപ്പ് ഫൈനല്‍ മത്സരം നടന്നത്. വെംബ്ലി സ്റ്റേഡിയം ആയിരുന്നു കലാശപ്പോരില്‍ മാഞ്ചസ്റ്റര്‍ ഡര്‍ബിക്ക് വേദിയായത്. ആവേശകരമായ മത്സരത്തില്‍ യുണൈറ്റഡിനെ വീഴ്‌ത്തി സിറ്റി കിരീടം ഉയര്‍ത്തുകയും ചെയ്‌തിരുന്നു.
എഫ്എ കപ്പ് ഫൈനല്‍ മത്സരം കാണാന്‍ മാഞ്ചസ്റ്റര്‍ സിറ്റിയുടെയും പ്യൂമയുടെയും പ്രത്യേക ക്ഷണമാണ് വിരാട് കോലിക്കും അനുഷ്‌ക ശര്‍മയ്‌ക്കും ലഭിച്ചത്. ആഗോള സ്‌പോര്‍സ് ബ്രാന്‍ഡായ പ്യൂമയുടെ ഇന്ത്യയിലെ ബ്രാന്‍ഡ് അംബാസഡര്‍മാരാണ് ഇരുവരും. ഇവര്‍ക്കൊപ്പം ഗില്ലും വെംബ്ലിയിലെ ആവേശപ്പോരാട്ടം കാണാനെത്തുകയായിരുന്നു.