മാറക്കാന:ചാമ്പ്യന്സ് ലീഗ് (UEFA Champions League) ഗ്രൂപ്പ് ഘട്ടത്തില് സമ്പൂര്ണ ജയം സ്വന്തമാക്കി മാഞ്ചസ്റ്റര് സിറ്റി (Manchester City). പ്രഥാമിക റൗണ്ടിലെ അവസാന മത്സരത്തില് സെര്ബിയന് ക്ലബ് റെഡ് സ്റ്റാര് ബെല്ഗ്രേഡിനെയാണ് സിറ്റി പരാജയപ്പെടുത്തിയത്. എവേ മത്സരത്തില് രണ്ടിനെതിരെ മൂന്ന് ഗോളുകള്ക്കായിരുന്നു സിറ്റിയുടെ ജയം (Red Star Belgrade vs Manchester City Match Result).
മൈക്ക ഹാമില്ട്ടണ് (Mica Hamilton), ഓസ്കര് ബോബ് (Oscar Bobb), കാല്വിന് ഫിലിപ്സ് (Kalvin Phillips) എന്നിവരാണ് സിറ്റിക്ക് വേണ്ടി മത്സരത്തില് ഗോള് നേടിയത്. ജയത്തോടെ ഗ്രൂപ്പ് ചാമ്പ്യന്മാരായി തന്നെ റൗണ്ട് ഓഫ് 16ല് ഇടം കണ്ടെത്താന് സിറ്റിക്ക് സാധിച്ചു.
പ്രീ ക്വാര്ട്ടര് യോഗ്യത നേരത്തെ തന്നെ ഉറപ്പിച്ചിരുന്ന സിറ്റി പ്രധാന താരങ്ങളില് പലരും ഇല്ലാതെ മാറക്കാനയില് പന്ത് തട്ടാനിറങ്ങിയ സിറ്റിക്ക് മത്സരത്തിന്റെ 19-ാം മിനിറ്റില് തന്നെ ലീഡ് സ്വന്തമാക്കാന് സാധിച്ചു. സിറ്റിക്ക് വേണ്ടി ആദ്യ മത്സരത്തിനിറങ്ങിയ മൈക്ക ഹാമില്ട്ടണാണ് സന്ദര്ശകര്ക്ക് വേണ്ടി ആദ്യം ഗോള് നേടിയത് (Mica Hamilton First Goal For Manchester City). ഒന്നാം പകുതിയില് കൂടുതല് അവസരങ്ങള് സൃഷ്ടിച്ചെങ്കിലും പിന്നീട് ഗോളുകളൊന്നും നേടാന് സിറ്റിക്ക് സാധിച്ചില്ല.