ഡൊമിനിക്ക:രവിചന്ദ്രന്‍ അശ്വിന്‍റെ (Ravichandran Ashwin) തകര്‍പ്പന്‍ ബൗളിങ് പ്രകടനമാണ് ഡൊമിനിക്കയില്‍ ഇന്ത്യയ്‌ക്ക് വെസ്റ്റ് ഇന്‍ഡീസിനെതിരായ ആദ്യ മത്സരത്തില്‍ അനായാസ ജയം സമ്മാനിച്ചത്. രണ്ടാം ഇന്നിങ്‌സില്‍ വിന്‍ഡീസിന്‍റെ ഏഴ് വിക്കറ്റുകള്‍ പിഴുത അശ്വിന് ആദ്യ ഇന്നിങ്‌സില്‍ അഞ്ച് വിക്കറ്റും നേടിയിരുന്നു. രണ്ടാം ഇന്നിങ്‌സിലെ ഇന്ത്യന്‍ സ്‌പിന്നറുടെ ബൗളിങ് കരുത്തില്‍ ആതിഥേയരെ 130 റണ്‍സില്‍ എറിഞ്ഞിട്ട ഇന്ത്യ ഇന്നിങ്‌സിനും 141 റണ്‍സിനുമാണ് ജയം പിടിച്ചത്.
ഡൊമിനിക്കയില്‍ 271 റണ്‍സിന്‍റെ ഒന്നാം ഇന്നിങ്‌സ് ലീഡ് സ്വന്തമാക്കിയ ഇന്ത്യയ്‌ക്കെതിരെ രണ്ടാം ഇന്നിങ്‌സില്‍ കരുതലോടെയായിരുന്നു വിന്‍ഡീസ് ബാറ്റിങ് ആരംഭിച്ചത്. നിലയുറപ്പിച്ച് കളിക്കാനായിരുന്നു അവരുടെ ശ്രമം. എന്നാല്‍, രവിചന്ദ്രന്‍ അശ്വിന് എന്ന പരിചയ സമ്പന്നനായ ബൗളര്‍ക്ക് മുന്നില്‍ വിന്‍ഡീസ് പോരാട്ടം പാഴായിപ്പോയി.
വിന്‍ഡീസ് രണ്ടാം ഇന്നിങ്‌സിലെ പത്താം ഓവറില്‍ തഗെനരൈന്‍ ചന്ദര്‍പോളിനെ വീഴ്‌ത്തിക്കൊണ്ട് രവീന്ദ്ര ജഡേജയാണ് ഇന്ത്യയുടെ വിക്കറ്റ് വേട്ടയ്‌ക്ക് തുടക്കമിട്ടത്. പിന്നാലെ ആയിരുന്നു അശ്വിന്‍റെ രംഗപ്രവേശം. വെസ്റ്റ് ഇന്‍ഡീസ് നായകന്‍ ക്രെയ്‌ഗ് ബ്രാത്ത്‌വെയ്‌റ്റായിരുന്നു അശ്വിന്‍റെ ആദ്യത്തെ ഇര.
47 പന്ത് നേരിട്ട് ഏഴ് റണ്‍സ് നേടിയ വിന്‍ഡീസ് നായകനെ അശ്വിന് അജിങ്ക്യ രഹാനെയുടെ കൈകളിലേക്ക് എത്തിച്ചു. ജെര്‍മെയ്‌ന്‍ ബ്ലാക്ക്‌വുഡാണ് (5) പിന്നീട് അശ്വിന് മുന്നില്‍ വീണത്. പിന്നാലെ അലിക്ക് അത്നാസെ (28), അല്‍സാരി ജോസഫ് (13), റഹ്‌കീം കോണ്‍വെല്‍ (4), കെമാര്‍ റോച്ച് (0), ജോമല്‍ വാരികന്‍ (18) എന്നിവരെയും തിരികെ പവലിയനിലെത്തിക്കാന്‍ അശ്വിന് സാധിച്ചു.