ಮದುವೆ ಎಂದರೆ ಅದೊಂದು ಸಂಭ್ರಮ. ಮದುವೆ ಮನೆಯಲ್ಲಿ ವಧು-ವರ ಆಕರ್ಷಣೆಯ ಕೇಂದ್ರ ಬಿಂದು. ಇದೇ ಕಾರಣದಿಂದ ಉಳಿದ ದಿನಗಳಿಗಿಂತ ಈ ದಿನ ಅವರು ಹೆಚ್ಚು ಸುಂದರವಾಗಿ ಕಂಗೊಳಿಸಬೇಕು ಎಂದು ಬಯಸುತ್ತಾರೆ. ಇದೇ ಕಾರಣಕ್ಕೆ ಮದುವೆಗೆ ವಾರ, ತಿಂಗಳಿಗೂ ಮೊದಲೇ ತಮ್ಮ ತ್ವಚೆ ಮತ್ತು ಕೂದಲಿನ ಕಾಳಜಿಗೆ ಮುಂದಾಗುತ್ತಾರೆ. ಚರ್ಮದ ಹೊಳಪಿಗೆ ಮೇಕಪ್ ಅವಶ್ಯಕವಾದರೂ ಆಂತರಿಕವಾಗಿ ಮಿನುಗಲು ಆಹಾರ ಶೈಲಿ ಹಾಗೂ ಜೀವನಶೈಲಿ ಸೇರಿದಂತೆ ಹಲವು ಅಂಶಗಳೇ ಕಾರಣವಾಗುತ್ತವೆ. ಅಂತಹ ಹೊಳಪಿನ ತ್ವಚೆಯನ್ನು ನಿಮ್ಮದಾಗಿಸಿಕೊಳ್ಳಬೇಕು ಎಂದರೆ ಈ ಸರಳ ಸಲಹೆಗಳನ್ನು ಪಾಲಿಸಿ.
ನಿದ್ದೆಯಲ್ಲಿ ರಾಜಿ ಬೇಡ:ಮದುವೆ ಹತ್ತಿರ ಬರುತ್ತಿದ್ದಂತೆ ಅದರ ಉತ್ಸಾಹ, ಆತಂಕಗಳಿಂದ ನಿದ್ದೆಯ ಅವಧಿ ಕಡಿತಗೊಳ್ಳುತ್ತದೆ. ಆದರೆ, ಇಂತಹ ತಪ್ಪು ಮಾಡಬಾರದು. ಸೌಂದರ್ಯದ ರಹಸ್ಯ ಅಡಗಿರುವುದೇ ನಿದ್ದೆಯಲ್ಲಿ ಎಂಬುದನ್ನು ಮರೆಯದೇ, ಪ್ರತಿ ರಾತ್ರಿ 8 ಗಂಟೆಗಳ ಕಾಲ ಉತ್ತಮ ನಿದ್ರೆ ಮಾಡಬೇಕು. ಇದರಿಂದ ನಿಮ್ಮ ತ್ವಚೆಯ ಕಾಂತಿ ಹೆಚ್ಚಾಗುತ್ತದೆ.
ಫೈಬರ್ ಡಯಟ್ಗೆ ಗಮನ ನೀಡಿ: ತಿನ್ನುವ ಆಹಾರಗಳು ನಮ್ಮ ತ್ವಚೆಯ ಮೇಲೆ ಪರಿಣಾಮ ಬೀರುತ್ತವೆ. ಇದೇ ಕಾರಣಕ್ಕೆ ಆಹಾರ, ಡಯಟ್ ವಿಷಯದಲ್ಲಿ ಗಮನ ಇರಬೇಕು. ಡಯಟ್ ಬಗ್ಗೆ ಗಣನೀಯವಾಗಿ ಬದಲಾವಣೆ ಮಾಡದಿದ್ದರೂ ಅದರಲ್ಲಿ ಫೈಬರ್ ಅಂಶ ಯಥೇಚ್ಛವಾಗಿರುವಂತೆ ನೋಡಿಕೊಳ್ಳಿ. ಇದನ್ನು ಮದುವೆಗೆ ತಿಂಗಳು ಇರುವ ಮುನ್ನ ಆರಂಭಿಸಿದರೂ ಸಾಕು. ಹಣ್ಣು ಮತ್ತು ತರಕಾರಿ ಸೇವನೆಗೆ ಆದ್ಯತೆ ನೀಡಿ. ಇದು ಹೆಚ್ಚಿನ ಫೈಬರ್ ಅಂಶ ಹೊಂದಿರುತ್ತದೆ.