ಮುಂಬೈ (ಮಹಾರಾಷ್ಟ್ರ): 'ದಿಸೀರಿಯಸ್ ಮೆನ್' ಸಿನಿಮಾದ ನಟ ನವಾಜುದ್ದೀನ್ ಸಿದ್ದಿಕಿ ಗುರುವಾರ 48ನೇ ವರ್ಷಕ್ಕೆ ಕಾಲಿಟ್ಟಿದ್ದಾರೆ. ಈ ವರ್ಷ ಕಾನ್ ಚಲನಚಿತ್ರೋತ್ಸವದಲ್ಲಿ ನಟ ಭಾರತೀಯ ನಿಯೋಗದ ಭಾಗವಾಗಿದ್ದಾರೆ. ಈ ಸಂಭ್ರಮದಲ್ಲಿರುವ ನಟ ಏಳನೇ ಬಾರಿಗೆ ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಿದ್ದಾರೆ.
ಖ್ಯಾತ ನಟ ನವಾಜುದ್ದೀನ್ ಸಿದ್ದಿಕಿ ಅವರು ಏಳನೇ ಬಾರಿಗೆ ಕಾನ್ ಚಲನಚಿತ್ರೋತ್ಸವದಲ್ಲಿ ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳಲಿದ್ದಾರೆ. ಕಾನ್ 2022 ರಲ್ಲಿ ಭಾರತೀಯ ನಿಯೋಗದ ಭಾಗವಾಗಿರುವುದರಿಂದ ಈ ವರ್ಷದ ಅವರ ಜನ್ಮದಿನವು 'ವಿಶೇಷ' ಮತ್ತು 'ಸ್ಮರಣೀಯ' ಎಂದು ನಟ ಹೇಳಿಕೊಂಡಿದ್ದಾರೆ.
2012 ರಲ್ಲಿ ಬಿಡುಗಡೆಯಾದ 'ಮಿಸ್ ಲವ್ಲಿ' ಮತ್ತು 'ಗ್ಯಾಂಗ್ಸ್ ಆಫ್ ವಾಸೇಪುರ್‌' ನಂತರ 2013 ರಲ್ಲಿ 'ಮಾನ್ಸೂನ್ ಶೂಟೌಟ್', 'ದಿ ಲಂಚ್‌ಬಾಕ್ಸ್', 'ಬಾಂಬೆ ಟಾಕೀಸ್' ಬಳಿಕ 2016 ರಲ್ಲಿ ಬಿಡುಗಡೆಯಾದ ರಮಣ್ ರಾಘವ್ 2.0 ಮತ್ತು 2018 ರಲ್ಲಿ ಬಿಡುಗಡೆಯಾದ ಮಾಂಟೊ - ಎಲ್ಲವನ್ನೂ ಕಾನ್ ಚಲನಚಿತ್ರೋತ್ಸವದಲ್ಲಿ ಪ್ರದರ್ಶಿಸಲಾಗಿದೆ.
ಈ ವರ್ಷ ಕಾನ್ನಲ್ಲಿ ಭಾರತೀಯ ತಂಡದ ಭಾಗವಾಗಿರುವ ನವಾಜ್ ತಮ್ಮ ಹುಟ್ಟುಹಬ್ಬದ ಆಚರಣೆಯ ಕುರಿತು ಮಾತನಾಡುತ್ತಾ, 'ಭಾರತವನ್ನು ಪ್ರತಿನಿಧಿಸುವುದು ಯಾವಾಗಲೂ ವಿಶೇಷವಾಗಿದೆ. ನನ್ನ ಚಲನಚಿತ್ರಗಳು ಕಾನ್ನಲ್ಲಿ ಪ್ರದರ್ಶನಕ್ಕೆ ಆಯ್ಕೆಯಾದ ಕಾರಣ ನಾನು ಇಲ್ಲಿ 6 ಹುಟ್ಟುಹಬ್ಬಗಳನ್ನು ಆಚರಿಸಿದ್ದೇನೆ. ಆದರೆ, ಈ ಬಾರಿ ಭಾರತೀಯ ಪ್ರತಿನಿಧಿಯಾಗಿ ಇದು ಹೆಚ್ಚು ವಿಶೇಷ ಮತ್ತು ಸ್ಮರಣೀಯವಾಗಿಸುತ್ತದೆ' ಎಂದಿದ್ದಾರೆ. ಕೆಲಸದ ನಡುವೆಯೂ ನಟ 'ಟಿಕು ವೆಡ್ಸ್ ಶೇರು', 'ನೂರಾನಿ ಚೆಹ್ರಾ', 'ಅದ್ಭುತ್' ಮತ್ತು 'ಲಕ್ಷ್ಮಣ್ ಲೋಪೆಜ್' ಸೇರಿದಂತೆ ಆಸಕ್ತಿದಾಯಕ ಚಿತ್ರಗಳಲ್ಲಿ ಅಭಿನಯಿಸಲಿದ್ದಾರೆ.