ગાંધીનગર: ગુજરાત સરકાર દ્વારા જાન્યુઆરીના તારીખ 10, 11 અને 12ના રોજ ગુજરાત ગ્લોબલ વાઈબ્રન્ટ સમિટની (Gujarat Global Vibrant Summit 2022) વ્યવસ્થા કરવામાં આવી છે, પરંતુ જે રીતે સમગ્ર વિશ્વમાં કોરોનાનો રાફળો ફાટ્યો છે, ત્યારે કોરોના મહામારીની ગુજરાત-ગ્લોબલ વાઇબ્રન્ટ સમિટ પર પણ આડકતરી અસર થવાની સંભાવના છે. વાત કરવામાં આવે તો અત્યાર સુધીમાં 20 જેટલા કન્ટ્રી પાર્ટનરો (Country Partners Gujarat Summit 2022) દ્વારા પોતાનું સમર્થન આપાયું છે. આ સાથે રાજ્ય સરકાર દ્વારા વર્ચ્યુઅલ વ્યવસ્થા ગોઠવાય તેવી સંભાવનાઓ સૂત્રો દ્વારા વ્યક્ત કરવામાં આવી છે. મળતી માહિતી પ્રમાણે, અત્યાર સુધીમાં હજુ 215 જેટલા ફોરેનર્સનું રજિસ્ટ્રેશન ગુજરાત ગ્લોબલ સમિટમાં થયું છે.
તમામ ડેલીગેશન દ્વારા ગાઈડલાઇન્સનો અમલ થશે
આ બાબતે ગુજરાત રાજ્યના આરોગ્ય અગ્રસચિવ મનોજ અગ્રવાલે જણાવ્યું હતું કે, કેન્દ્ર સરકાર દ્વારા નવા વાયરસને પગલે જે ગાઇડલાઇન્સ બહાર પાડવામાં આવી છે તે તમામ લોકો ઉપર અસરગ્રત હશે. આ બાબતે આરોગ્ય વિભાગ અને ઉદ્યોગ વિભાગ સતત સંપર્કમાં છે. આમ જે પણ વ્યક્તિ સમિટમાં ભાગ લેશે તે તમામ લોકોએ કોરોના ગાઇડલાઇન્સનું (Corona Guidelines) ચોક્કસ પણે પાલન કરવું પડશે. સૂત્રો તરફથી મળતી માહિતી અનુસાર, ૨૦ જેટલા જાહેર થયેલા દેશો વાઈબ્રન્ટ ગુજરાતના કન્ટ્રી પાર્ટનર તરીકે સહભાગી થશે. કન્ટ્રી પાર્ટનરની યાદી છે, યુકે, યુરોપના ડેન્માર્ક, ફ્રાન્સ ,ફિનલેન્ડ, નેધરલેન્ડ અને પોલેન્ડ જેવા કન્ટ્રી ગુજરાત ગ્લોબલ વાઇબ્રન્ટ સમિટના કન્ટ્રી પાર્ટનર બન્યા છે, જ્યારે યુરોપના વધુ બે દેશો જર્મની અને નોર્વે પણ કન્ટ્રી પાર્ટનર બની શકે તેવી પણ અટકળો છે.
વર્ચ્યુલી હાજર રહેવાની વ્યવસ્થા થશે
જે રીતે કોરોના વાયરસનો સમગ્ર વિશ્વમાં વિસ્ફોટ થયો છે, તેને કેન્દ્રમાં રાખીને રાજ્ય સરકાર દ્વારા ગુજરાત વાઇબ્રન્ટ ગ્લોબલ સમિટ અંતર્ગત અનેકડેલીગેશન માટે ઉપસ્થિત રહેવાની વ્યવસ્થા કરવામાં આવે તેવી પણ શક્યતાઓ સેવાઇ રહી છે. આ સાથે અનેક કન્ટ્રી પાર્ટનર ગુજરાત વાઇબ્રન્ટ સમિટમાં વર્ચ્યુઅલી હાજર રહેશે. આ ઉપરાંત વાઇબ્રન્ટ ગુજરાત 2022 મહાત્મા મંદિર ખાતે આવનારા તમામ લોકોએ આરટીપીસીઆર ટેસ્ટ ફરજીયાત કરાવાનો રહેશે. આ અંગે રાજ્ય સરકાર દ્વારા ટૂંક સમયમાં જ જાહેરાત કરાય તેવી પણ સંભાવના છે.