વડોદરાઃ વડોદરા ખાતે બેટી બચાઓ બેટી પઢાઓ ટાસ્કફોર્સ સમિતિની બેઠક યોજવામાં આવી હતી. 'બેટી બચાઓ બેટી પઢાઓ' યોજના અંતગર્ત બાળાઓના આરોગ્ય અને શિક્ષણ માટે વધુમાં વધુ કાર્યો થઇ શકે તે માટે કલેકટરે બેટી બચાઓ બેટી પઢાઓનો અસરકારક અને પ્રોત્સાહક સંદેશ આવરી લેતા સમુચિત કાર્યક્રમો અને કથાનકો બનાવી સોશિયલ મીડિયા મારફતે દર્શાવવા સૂચના આપી હતી. તેમણે ખાસ કરીને દીકરીઓને ઉચ્ચ શિક્ષણ સુધી ભણતરની તકો સુલભ બને અને છોકરીઓમાં ડ્રોપ આઉટનો દર લઘુત્તમ રહે તે માટે યોગ્ય વાતાવરણ રચતા આયોજનો કરવા અનુરોધ કર્યો હતો.
કલેક્ટરે સંબંધિત અધિકારીઓને સંકલન કરી બેટી બચાઓ બેટી પઢાઓ યોજનાના પ્રચાર-પ્રસાર હેતુ બેટી બચાઓ બેટી પઢાઓ દર્શાવતી કિટસ અને બેગ્સ બનાવવા અને તેની ડિઝાઇન રેડી કરવા જણાવ્યું છે. દીકરી વધામણા, હાઇજીન કિટ અને ગુડાગુડી બોર્ડસ તથા દીકરા-દીકરી જન્મદર દર્શાવતા ચાર્ટ્સ સાથે પણ બેટી બચાઓ બેટી પઢાઓ થીમને જોડવા અંગે ઘટતું કરવા સૂચન કર્યુ હતુ. વર્ષ 2020-21 દરમિયાન બેટી બચાઓ બેટી પઢાઓ જાગૃત્તિ કાર્યક્રમો યોજવા, કોરોના મહામારીને લીધે જાગૃત્તિ કાર્યક્રમો માટે રેડિયો તેમજ રેડિયો જિંગલ તથા સોશિયલ મિડીયાના માધ્યમ દ્વારા કરવા અંગે ચર્ચા કરવામાં આવી હતી. વધુમાં બાળ અધિકારોના, બાળ લગ્ન કાયદો, પોકસો તેમજ પીસી-પીએનડીટી કાયદાઓની માહિતી અને માર્ગદર્શન તથા ગુડ ટચ બેડ ટચની સમજ આપવા માટેના પગલાઓ હાથ ધરવા અને વધુમાં વધુ લોકો સુધી પહોંચવાના ઉદ્દેશ્ય સાથે જાગૃત્તિ કાર્યક્રમો યોજવામાં આવશે.