કોંગ્રેસ શાસિત ગાંધીનગર જિલ્લા પંચાયતમાં ગુરૂવારે બપોરના સમયે સામાન્ય સભા મળી હતી. જેમાં સમિતિઓના ચેરમેનના મુદ્દે સભા ઉગ્ર થાય તેવા ભણકારા જોવા મળ્યા હતા. પરંતુ સામાન્ય સભામાં ચર્ચાયેલા 12 મુદ્દાને એક પછી એક મંજૂર કરવામાં આવતા નિયત સમયમાં સભા પૂર્ણ થઈ હતી. સભા દરમિયાન માત્ર સામાજિક ન્યાય સમિતિના ચેરમેન દ્વારા જ રજૂઆત કરવામાં આવતી હતી.
સામાન્ય સભામાં એક વખત ફરી રેતી કાકરીની ગ્રાન્ટ મુદ્દે અવાજ ઉઠયો હતો. સામાજિક ન્યાય સમિતિના ચેરમેન એલ.એન.પરમારે કહ્યું હતું કે, સામાજિક ન્યાય સમિતિને આ ગ્રાન્ટમાંથી એક પણ રૂપિયો ફાળવવામાં આવ્યો નથી. જેને લઇને ધારાસભ્ય ડૉક્ટર સી.જે.ચાવડાએ તેમને ગ્રાન્ટ આપવાને મુદ્દે સમર્થન આપ્યું હતું.
જિલ્લા પંચાયતમાં અધિકારીઓ અને પદાધિકારીઓના પાર્કિંગની જગ્યા નહીં હોવાનો મુદ્દો પણ ચર્ચાયો હતો. આ ઉપરાંત ભંડોળમાં રહેલી રકમમાં દરેક સભ્યોને 20 લાખ રૂપિયા ગ્રાન્ટ આપવામાં આવે તેવી પણ માગ સભા દરમિયાન કરવામાં આવી હતી.